Astanada qoǵamdyq kólikke arnap 10 myńnan astam vırtýaldy tarıf shyǵaryldy

ASTANA. KAZINFORM – Astanada 26 tamyzdan bastap qoǵamdyq kólikterde mektep jáne jeńildigi bar sanattaǵy azamattar vırtýaldy tarıfpen valıdatsııa jasaı alady. Bul týraly elorda ákimdiginiń resmı saıty CTS-ke silteme jasap habarlaıdy.

Vırtýaldy tarıf rásimdeý tolyǵymen onlaın jasalady, ortalyq kassaǵa barýdyń qajeti joq. Rásimdeý tegin.

Valıdatsııa «Avtobys» qosymshasymen QR kodty skanerleý, Bluetooth nemese kólik kodyn engizý arqyly júzege asyrylady.

Tarıfti rásimdeý úshin:

1. Smartfonǵa «Avtobys» qosymshasyn ornatý;

2. Jeńildik alýshynyń telefon nómirimen qosymshaǵa tirkelý;

3. Transcard.kz saıtynyń «Elektrondyq ótinimder» bóliminde ótinish berý. Derekterdi toltyrý jáne qujattardy tirkeý qajet.

Ótinim 1-3 jumys kúni ishinde óńdeledi (poshtaǵa habarlama keledi). Keıin vırtýaldy tarıf «Avtobys» qosymshasyna qosylady jáne ony paıdalanýǵa bolady. Vırtýaldy tarıftiń merzimi joq.

Mańyzdy:
1. Tarıfti qoldaný úshin ınternet qajet, al teńgerim kerek emes.

2. Qaýipsizdik maqsatynda vırtýaldy tarıf paıdalanýshynyń qurylǵysyna baılanystyrylady. Qurylǵy nemese telefon nómiri ózgergen jaǵdaıda R.Qoshqarbaev dańǵyly, 50/1 mekenjaıynda ornalasqan CTS Ortalyq kassasyna júginýge bolady.

Sonymen qatar, mektep oqýshylary men jeńildikti azamattar plastıkalyq kólik kartalaryn paıdalanýdy jalǵastyra alady. Mektep/jeńildik kólik kartasyn eki jolmen rásimdeýge bolady:

- R. Qoshqarbaev dańǵyly, 50/1 mekenjaıyndaǵy Ortalyq kassadan;

- Transcard.kz saıtynda onlaın tapsyrys berý arqyly. Bul rette daıyn kólik kartasyn Ortalyq kassanyń resepshninen talon almaı, kezek boıynsha alýǵa bolady.

Mektep kólik kartasyn alý úshin:

- oqý ornynan anyqtama qajet (mektep, kolledj);
- týý týraly kýálik (JSN bar) nemese jeke kýálik;
- 3h4 bir foto.

Kassaǵa júgingen jaǵdaıda qosymsha ata-anasynyń biriniń jeke kýáligi.

Mektep kólik kartasyn alǵashqy alý quny 1000 tg. Qaıta shyǵarý – 2000 teńge.

Kassanyń jumys kestesi: dúısenbi – senbi kúnderi saǵ. 09:00-den 17:45-ge deıin, úzilissiz. Jeksenbi – demalys.