Astanada Qazaq tarıhı qoǵamy quryldy
Elordada «Qazaq tarıhı qoǵamy» qoǵamdyq birlestigi qurylyp, resmı túrde tirkeldi. Bastamashy top arasynda Sultan Ákimbekov, Radık Temirǵalıev, Armanjan Baıtasov, Maıa Bekbaeva syndy tanymal tulǵalar bar, dep habarlaıdy Kazinform.
«Qazaqstanda búgingi kúnge deıin 2 geografııalyq qoǵam boldy, al tarıhı qoǵam bolmaǵan edi. Qazaq tarıhı qoǵamynyń basty fýnktsııalarynyń biri – ǵalymdardyń ǵylymı kásipodaǵy men qoǵam arasyndaǵy kópir bolý. Óıtkeni ǵalymdar tek ǵalymdar úshin jazady, onyń kópshilikke jetýin oılaı bermeıdi. Bizde aı saıyn jańa ǵylymı jańalyqtar ashylady, biraq, ókinishke oraı, bizdiń azamattyq qoǵam bul týraly bilmeıdi. Bul málimetterdi jurtshylyqqa jetkizý bizdiń mindetimiz», - dedi tarıhshy, Joshy ulysyn zertteý ǵylymı ınstıtýty dırektorynyń mindetin atqarýshy Jaqsylyq Sábıtov «Sheraton» qonaq úıinde birlestiktiń tusaýkeserinde.
Basqarma múshesi, jýrnalıst Armanjan Baıtasov tarıhı birlestik rasynda da qajet ekenin, qazir aýdıtorııanyń Qazaqstan tarıhyna úlken qyzyǵýshylyq tanytyp otyrǵanyn atap ótti.
«Muny medıa salasynyń mamany retinde tolyq senimmen aıta alamyn. Qazaqstan tarıhyna arnalǵan arnalǵan baǵdarlamalardyń óte kóp qaralym jınaıtynyn, halyqtyń Alashorda tarıhynan bastap, belgili bir tulǵalardyń ómirbaıanyna qyzyǵýshylyǵyn kórip otyrmyz. Endi birlestiktiń negizgi maqsaty – ǵalymdar men halyq arasynda kórip quryp, laıyqty platforma berý. Tilshilerge tarıhı sarapshylardy usynyp, tarıhı turǵyda sapaly konsýltatsııa bere alsaq, budan bári utady», - deıdi A. Baıtasov.
Qoǵamdyq birlestik ulttyń tarıhı sanasy men tarıh ǵylymyn damytýdy maqsat etip otyr. Tarıhı zertteýler men kópshilikke arnalǵan ǵylymı ádebıetter, sol zertteý nátıjelerin dáripteıtin fılm, ózge de týyndylardy jasaý úshin úzdikterdi tartý, sapaly irikteý júrgizý kózdelgen.
«Kóptegen elderde osyndaı tarıhı qoǵamdar bar, óıtkeni bul ǵalymdar úshin, jýrnalıster men qoǵam ókilderi úshin alań qurýǵa múmkindik beretin birlestikter. Bizdiń tarıhshylar, ólketanýshylar óz aımaǵynyń tarıhyn óz betinshe, esh qoldaýsyz zerttep júr. Muny júıeleý qajet. Birlestiktiń maqsattary men mindetteri ýaqyt óte kele túzetiledi, biraq eń bastysy – osy kúsh-jigerdi shoǵyrlandyrýǵa múmkindik beretin alań qurý. Bizdiń esigimiz barlyǵyna ashyq. Qazirdiń ózinde birlestiktiń múshesi bolǵysy keletinder ótinish bildirýde. Memlekettik, kvazımemlekettik tarıhı uıymdarmen básekege túsý oıda joq. Olarmen baılanys ornatyp, ortaq múdde – tarıhı sana men tarıh ǵylymyn damytýǵa óz úlesimizdi qospaqpyz», - deıdi tarıhshy Radık Temirǵalıev.
Uıymdastyrýshylardyń aıtýynsha, joba sátti júzege assa, qoǵamdyq birlestik aýqymy aımaqtarǵa taratylady.
