Astanada Kardıff ýnıversıtetiniń kampýsy ashylady
ASTANA. KAZINFORM – Sońǵy eki jylda shetelden 33 myqty zertteýshi ýnıversıtetter Qazaqstanǵa kelýge kelisti. Bul týraly Ǵylym jáne joǵary bilim mınıstri Saıasat Nurbek aıtyp berdi.
«Bizdiń qazir basym baǵytymyz – Qazaqstandy úlken akademııalyq jáne zertteýshi habqa aınaldyrý. Sońǵy eki jylda shetelden 33 myqty zertteýshi ýnıversıtetter Qazaqstanǵa kelýge kelisti. Bul jumys jalǵasýda. Búgin ǵana Londonnan keldim, onda Kardıff ýnıversıtetimen qol qoıdyq. Bul Russell Group atty Ulybrıtanııanyń myqty ýnıversıtetter tobyna kiretin oqý orny. Eń aldymen Queen's University Belfast Almatyda ashylǵan edi, endi Astanada Cardiff University úlken kampýs ashady», - dedi Ǵylym mınıstri elordada «Digital Kazakhstan: zamanaýı bilim berý» atty Tamyz sammıtinde.
Kardıff ýnıversıteti úshin Astanadan 14 gektar jer bólingen.
«Kardıffke qoıylǵan birinshi maqsat – halyqaralyq standarttaǵa sáıkes pedagogterdi daıyndaý. Sondyqtan Nazarbaev ýnıversıtetine, bizidń negizgi ulttyq pedagogıkalyq ýnıversıtetterge bul ári kómek, ári báseke bolady. Osylaı, shet tilin meńgergen myqty halyqaralyq deńgeıdegi pedagogtardy ózimizde daıarlaımyz», - dedi S. Nurbek.
Sonymen birge, sala mınıstri eldegi árbir óńirlik memlekettik ýnıversıtetke sheteldik seriktes oqý oryndary bekitilgenin eske saldy.
«Shotlandııanyń eń kóne tehnıkalyq ýnıversıteti, munaı-gaz baǵytynda mamandanǵan Heriot-Watt University Aqtóbedegi Jubanov ýnıversıtetine ornalasty. Olar alǵashqy jyly 300 balany, bıyl 250 balany qabyldap, 550 stýdentke bilim berýde. Taǵy bir maqsat – óńirlik ýnıversıtetterimizdi transformatsııalaý. Seriktesterimizben naqty kelisimshartpen bekitilgen, aldaǵy 4-5 jylda jergilikti ýnıversıtetter sheteldik standarttarǵa saı zertteýshi ýnıversıtetke aınalýy kerek jáne árbir ýnıversıtet óńirdiń damý núktesi bolýy kerek», - dedi Saıasat Nurbek.
Buǵan deıin Ǵylym jáne joǵary bilim mınıstri ǵylymı jumystar men dıssertatsııa jazǵanda jasandy ıntellekt qoldaný erejesin túsindirgen edi.
