Astanada qar kúreýge 1600-den astam arnaıy tehnıka shyǵaryldy
ASTANA. KAZINFORM — Elordada sońǵy kúnderi qalyń qar jaýdy. Qar tazalaý jumysy táýlik boıy jalǵasýda. Kommýnaldyq qyzmetter úzdiksiz kúsheıtilgen rejımde jumys istep jatyr. Bul ýtýraly qala ákimdiginiń resmı saıty habarlady.


10 naýryz kúni tańerteńnen beri Astanada 2600-ge jýyq jol qyzmetkeri men 1645 arnaıy tehnıka qar tazalaýǵa shyqty. Naýryzdyń 10-na qaraǵan túni kommýnaldyq qyzmet 2726 aýyr júk kóligimen qaladan 38 524 tekshe metr qar shyǵardy.

Qys mezgiliniń basynan beri 570 454 aýyr júk kóligimen qaladan 7,1 mıllıon tekshe metrden astam qar shyǵaryldy. Eń aldymen, erejege sáıkes, joldarda keptelis bolmas úshin qozǵalysy óte qarqyndy oryndar tazartylady.

Sondaı-aq, qarqyndylyǵy ortasha ýchaskeler — alańdar, vokzal mańy aýmaqtary, trotýarlar, áleýmettik nysandarǵa kirme joldar jáne t. b. tazartylady.

Ortalyq kóshelerdi, jolaýshylar kóligi marshrýttary júretin oryndardy, aıaldamalar men trotýarlarda tazalaý da basymdyqqa ıe.

Qalada birneshe jabdyqtalǵan qar polıgony bar. Olar samosval tehnıkasynyń nómirlik belgilerin oqý júıesimen jabdyqtalǵan, munda beınebaqylaý kameralary ornatylyp, jaryqtandyrý qosylǵan.

— Elorda turǵyndary men qonaqtarynan joldarda abaı bolýdy, qaýipsizdik erejelerin saqtaýdy, daýyldy eskertý bolǵan jaǵdaıda alys saparlarǵa shyqpaýdy suraımyz. Tótenshe jaǵdaı týyndaǵan kezde «112» nómirine habarlasyńyz, — delingen habarlamada.

Eske salsaq búgin 8 oblysta jol jabylǵan edi.