Astanada «JETI QAZYNA» etnoaýyly ashyldy
ASTANA. KAZINFORM — Halyqaralyq balalardy qorǵaý kúni Astanadaǵy Nazarbaev Ýnıversıtetiniń aýmaǵynda «JETI QAZYNA» etnoaýyly esigin aıqara ashty. Joba qazaqtyń mádenı murasyn, qolónerin jáne dástúrli ómir saltyn nasıhattaýǵa baǵyttalǵan. Bul týraly elorda ákimdigi málim etti.
Etnoaýyl qazaq mádenıetiniń basty nyshandaryn bir alańda toǵystyrdy: batyr, sulý qyz, búrkit, qarý-jaraq, tazy, jylqy, oı-bilim.
Jobanyń bastamashysy ári avtory – kásipker Baýyrjan Bilman. Ol ishki, ásirese balalar týrızmin damytýǵa den qoıyp júr.
— Astana — bul elorda, munda árdaıym týrıster bar, ıaǵnı suranys ta bar. Men gıdter men ekskýrsovodtardyń problemalaryn zerttedim. Bizdiń muramyzdy kórsetý úshin olar qala syrtyna, Qosshyǵa shyǵýǵa májbúr. Ádette barlyq nysan ár jerde ornalasqan – búrkitshi, tazy, jylqy, sheberler – bári bólek-bólek. Ekskýrsovodtarǵa marshrýt jasaý qıyn, bul ýaqyt alady, sonyń saldarynan servıs zardap shegedi, — dedi kásipker.
Etnoaýyl etnomýzeı qyzmetin de atqarady. Munda qazaqstandyq qolónershilerdi qoldaýǵa erekshe nazar aýdarylǵan. Qazaqstannyń túkpir-túkpirinen kelgen sheberlerdiń kórmeleri men sheberlik saǵattary ótkiziledi, kıizden buıym jasaý, aǵash oıý, sýret salý, ulttyq órnek jasaý.
Kelýshiler atqa minýdi, sadaq atýdy, asyq atý, toǵyzqumalaq, arqan tartý sekildi ulttyq oıyndar oınaýdy da tájirıbeden ótkize alady.
Baǵdarlamada sondaı-aq:
dombyra, aıtys, terme, jyraý sııaqty qazaq klassıkasyn tiri oryndaý;
ulttyq bıler men teatrlandyrylǵan qoıylymdar;
dástúrli taǵamdar daıyndaýǵa arnalǵan aspazdyq sheberlik sabaqtary;
búrkit jáne tazy ıttermen kórsetilimder bar.
Týrıstik toptar úshin 3–4 saǵatqa sozylatyn keshendi mádenı baǵdarlama usynylady.
Etnoaýyl jaz boıy ár senbi jáne jeksenbi kúnderi jumys isteıdi.
Eske sala keteıik, buǵan deıin Qazaqstan Prezıdenti men Abý Dabıdiń Taq murageri «Etnoaýyl» kórmesin aralaǵanyn jazǵan edik.