Astanada ıslam qarjy aptalyǵy ótip jatyr
«Astana» halyqaralyq qarjy ortalyǵynyń uıytqy bolýymen ótip jatqan aptalyq aıasynda Qazaqstanda jáne álemde ıslamdyq qarjylandyrýdy damytýdyń ındýstrııasy, qarjy salasynyń kásibı mamandaryna arnalǵan dıalogtyq alań jáne AHQO bazasynda ıslamdyq qarjylandyrý ınfraqurylymyn qurýǵa arnalǵan dóńgelek ústelder ótip jatyr.
«Islam qarjy aptalyǵy aıasynda Qazaqstanǵa alǵash kelýim. Bizdiń maqsat - qarjy salasyn sharıǵat erejesine saı júrgizý jáne damytý. Men ıslam qarjy júıesi barlyq musylman halqy úshin jaqsy múmkindik dep esepteımin. Tek Qazaqstan emes, Ortalyq Azııa elderi úshin de solaı. Islam qarjylandyrý júıesi búginde Azııa, Eýropa elderinde joǵary qarqynmen ilgerileýde. Biz oqytyp jatqan kýrs - Islam qarjy ınstıtýty bekitken Sharıǵat standarttaryna saı oqytatyn, arnaıy ázirlengen baǵdarlama. Bul baǵdarlama álemniń 5 elindegi ıslam qarjylandyrý salasynda qoldanylady. Osy turǵyda Qazaqstan bıligi de eldegi barlyq ıslam bankterinde osy júıeni qabyldap, engizedi degen úmittemiz», - dedi Islami Pakistan jáne Summit Bank Limited bankteriniń Sharıatty baqylaý jónindegi komıssııanyń tóraǵasy Irshad Ahmad Alıah. 
Aptalyq barysynda AHQO-nyń úzdiksiz kásibı damý bıýrosy halyqaralyq býhgalterlik esep jáne aýdıt uıymy Islam qarjy ınstıtýtymen birigip (AAOIFI) «Certified Islamic Professional Accountant» (CIPA) atty biliktilik kóterý semınaryn uıymdastyryp otyr. CIPA - Islam qarjy ınstıtýty esep júrgizý salasyndaǵy banktik operatsııalardyń barlyq túri qamtylǵan, ıslamdyq saqtandyrý men ınvestıtsııalandyrýdaǵy álemdik deńgeıde moıyndalǵan baǵdarlama.
«Men sharıǵatty baqylaý mamany retinde ıslamdyq qarjylandyrýdaǵy adamı kapıtaldyń damýy men onyń problemalary týraly sóz qozǵadym. Sol sııaqty ıslamdyq qarjylandyrýdyń sharıǵat standarttaryna saı jumys isteý negizderi týraly aıttym. Qatysýshylardyń qyzyǵýshylyǵy men suraqtary kóp, soǵan qaraǵanda qoldaý tabady dep oılaımyn. Kýrs úsh kúnge sozylady, alda áli eki kún bar», - dedi Islam qarjy ınstıtýtynyń kásibı damý jónindegi jetekshisi Farhan Nur.
Qarjylyq aptalyq jumysyna qarjy uıymdarynyń basshylary men bank jetekshileri, sondaı-aq býhgalterlik esep jáne aýdıt qyzmeti qyzyqtyratyn sala mamandary qatysýda.
Aıta keteıik, Accounting and Auditing Organization for Islamic Financial Institutions (AAOIFI) - Islam qarjy mekemeleri úshin Sharıat standarttaryn damytý men qoldaý maqsatynda Bahreınde negizdelip qurylǵan kommertsııalyq emes uıym.
Al, CIPA - Islamdyq qarjylandyrý boıynsha adamı resýrstardyń múmkindigin keńeıtý men damytýǵa baǵyttalǵan baǵdarlama.
Eske sala keteıik, AHQO ústimizdegi jyldyń 29 qyrkúıeginde Global Islamic Finance Awards (GIFA) - Islamdyq qarjylandyrý salasyndaǵy eń aıtýly syılyqpen marapattaldy. Ol «Islamdyq qarjylandyrýdy ınstıtýtsıonaldyq qoldaý», «Islamdyq qarjylandyrý saıasatyn ázirleý» jáne «Adamı kapıtaldy damytýdaǵy bastama» nomınatsııalary boıynsha úzdik dep tanyldy.
