Astanada ınternet jelisi arqyly alaıaqtyq jasaǵan jigit qolǵa tústi

ASTANA. QazAqparat - Elordanyń Baıqońyr aýdany PB krımınaldyq polıtsııa qyzmetkerleri jedel-izdestirý is-sharalaryn júrgizý barysynda alaıaqtyq jasaǵan 18 jastaǵy Aqmola oblysynyń turǵynyn ustady, dep habarlaıdy QazAqparat.

Tergeý barysynda anyqtalǵandaı, jábirlenýshi «Olh» saıtyna óziniń noýtbýgyn «Ihpone 13» markaly uıaly telefonǵa aýystyramyn degen habarlama ornalastyrady. Sodan keıin oǵan jas jigit habarlasyp, noýtbýkka uıaly telefonyn aýystyratynyn aıtyp sendirgen. Ekeýi zattaryn bir-birine taksı arqyly salyp jiberetin bolyp kelisedi. Jábirlenýshi óziniń noýtbýgyn kórsetilgen meken-jaıǵa taksı arqyly salyp jiberedi, alaıda jas jigit ýádesin oryndamaı uıaly telefonyn óshirip, habarsyz ketken. Keltirilgen shyǵyn kólemi 147 myń teńgeni qurady.

«Atalǵan fakti boıynsha sotqa deıingi tergeý amaldary júrgizilýde. Onyń elorda aýmaǵynda osyǵan uqsas qylmystarǵa qatystylyǵy anyqtalýda. Astana qalasynyń Polıtsııa departamenti azamattarǵa qyraǵy bolýdy, beıtanys adamdarǵa senbeýdi eskertedi», - dep jazdy vedomstvodan.