Astanada gaz qubyryn tartý jumystary qaı deńgeıde

NUR-SULTAN. QazAqparat – 200 myń elordalyq kógildir otynnyń qyzyǵyn kóredi. Bul týraly Nur-Sultan qalalyq otyn-energetıkalyq kesheni jáne kommýnaldyq sharýashylyq basqarmasy otyn-energetıkalyq resýrstar bóliminiń basshysy Maqsat Esmaǵulov aıtty, dep habarlaıdy QazAqparat tilshisi.

«Gaz jelileri túgel tartylǵan jáne qosylý múmkindigi bar turǵyn úı alaptaryna Kóktal-1, Kóktal-2, Agrogorodok, Temirjolshylar, Promyshlennyı, Ońtústik Shyǵys alabynyń oń jáne sol jaǵy, Kúıgenjar, Aqbıdaı, Qazaq aýyly, Moskovskaıa, Potanın kóshesi boıyndaǵy úsh shaǵyn aýdan kiredi. Qazirgi ýaqytta gazǵa qosylý múmkindigi bar abonentterdiń sany 14 myńǵa jetti. Olarda 200 myń adam turady. Gazǵa qosylǵan abonentterdiń sany 5 myńǵa taıady», - dedi ol elorda ákimdiginde ótken baspasóz máslıhatynda.

Onyń atap ótýinshe, Nur-Sultan qalasynyń ákimdigi jeke sektormen qatar JEO-1, JEO-2 jáne JEO-3-ti gazǵa aýystyryp jatyr.

«Qazirgi ýaqytta JEO-2-de bul jumys aıaqtalyp, ortalyq gazben jumys isteý múmkindigine ıe boldy. JEO-1-degi 10 qazandyqtyń 7-eýi gazǵa qosyldy. Qalǵan 3 qazandyqta qurylys-montajdaý jumystaryn aıaqtap jatyrmyz. Kelesi jylytý maýsymyna deıin bul qazandyqtar tolyǵymen gazǵa kóshiriledi, ıaǵnı ortalyqty gazǵa kóshirý jumysy aıaqtalady. Keleshekte iske qosylatyn JEO-3 jobasyna qajetti ózgeris engizildi. Ol gazben jumys isteıtin bolady», - dedi Maqsat Esmaǵulov.

Buǵan deıin habarlaǵanymyzdaı, astanadaǵy turmysy tómen otbasylardyń úıine gaz tartýǵa bólinetin soma 2 ese ulǵaıdy, eseptegishter tegin beriledi.