Astanada esirtki zerthanasy joıylyp, úsh qylmystyq top ustaldy

ASTANA. KAZINFORM - 11 naýryzdan bastap QR ÁQBtK-niń 440-1-baby kúshine endi. Ol esirtkini medıtsınalyq emes maqsatta qoldanǵany úshin ákimshilik jaýapkershilik qarastyrady. Osy ýaqyt ishinde 683 adam jaýapqa tartylyp, olardyń 510-y ákimshilik qamaýǵa alyndy.

Elordada sıntetıkalyq esirtki aınalymyna qarsy júrgizilip jatqan jumys týraly Polıtsııa departamentiniń Esirtki qylmysyna qarsy is-qımyl basqarmasynyń asa mańyzdy ister jónindegi aǵa jedel ýákili Álııa Qıbatqyzy Kommýnıkatsııalar qyzmetinde ótken brıfıngte aıtyp berdi, dep habarlaıdy Astana ákimdiginiń resmı saıty.
Spıkerdiń aıtýynsha, elordadaǵy esirtkiniń negizgi kózi – jasyryn zerthanalarda óndiriletin sıntetıkalyq zattar. Olardy jasaý ońaı ári ınternet arqyly tez taralýy saldarynan mundaı esirtkiler qala ortasyna jyldam enip jatyr.

Osyǵan baılanysty polıtsııanyń jeke quramyna esirtki zerthanalaryn anyqtaý jáne ony taratýmen aınalysatyn uıymdasqan qylmystyq toptardyń jolyn kesý mindeti qoıylǵan.

- Jumystyń tıimdiligin arttyrý maqsatynda esirtki qylmystarynyń aldyn alý jáne anyqtaý boıynsha ádistemelik usynymdar daıyndalyp, departamenttiń barlyq bólimshesine joldandy. Bıyl arnaıy jedel-izdestirý is-sharalary barysynda ınternet arqyly esirtki saýdalaǵan úsh uıymdasqan qylmystyq toptyń áreketi toqtatyldy. Sondaı-aq sıntetıkalyq esirtki óndiretin bir esirtki zerthanasy joıyldy. Qylmystyq shemalardyń barlyq qatysýshysy ustalyp, ýaqytsha ustaý ızolıatoryna qamaldy», – dedi Álııa Qıbatqyzy.

Jyl basynan beri sıntetıkalyq esirtkige qatysty 698 is tirkelgen. Onyń 207-si – qylmystyq sıpattaǵy fakti, onyń ishinde 138-i – esirtki satý derekteri. Zańsyz aınalymnan 45 keliden astam sıntetıkalyq zat alyndy.

Elorda polıtseıleri kúndelikti ınternet-keńistikti baqylap, esirtki jarnamasy men satylymyna qatysty zańsyz kontentti anyqtap otyrady.
Nátıjesinde 1 263 ınternet-resýrs buǵattaýǵa joldanǵan.

- Sonymen birge esirtki qylmysy úshin paıdalanylǵan 2 564 bank kartasy buǵattaldy. Olarda aınalǵan jalpy soma – 55,6 mln teńge. Esirtkini nasıhattaý nemese zańsyz jarnamalaý faktileri boıynsha QR QK 299-1-baby boıynsha 13 qylmystyq is qozǵaldy, - delingen habarlamada.

Astana qalasy ákimdiginiń habarlaýynsha, esirtki bıznesi qoǵamdyq qaýipsizdikke tónetin eń úlken qaterlerdiń biri bolyp qala beredi. Ol halyq densaýlyǵyna, áleýmettik turaqtylyqqa jáne ulttyq qaýipsizdikke eleýli zııan keltiredi.

Osyǵan deıin Almatyda elge esirtki kirgizbek bolǵan sheteldik 15 jylǵa sottalǵany týraly jazdyq.