Astanada erekshe sheberlik sabaǵy ótti
ASTANA. KAZINFORM – Pasha merekesi qarsańynda elordanyń Dostyq úıinde Pasha jumyrtqalaryn boıaý jáne Pasha bálishterine qamyr jasaý boıynsha erekshe sheberlik sabaǵy ótti. Oǵan erekshe qajettilikteri bar balalar men túrli etnos ókilderi qatysty. Bul týraly Astana ákimdigi habarlady.
Іs-sharany Astana qalasynyń Qazaqstan halqy assambleıasy janyndaǵy Analar Keńesi uıymdastyrdy.
Balalar şetka, qaryndash, applıkatsııalar jáne basqa da sándik materıaldardy paıdalanyp, Pasha jumyrtqalaryn boıaýdy úırendi. Olar sondaı-aq Pasha bálishterine qamyr daıyndaýǵa qatysyp, erekshe retsepterdi úırendi. sheberlik sabaǵynyń kórkin túrli táttiler arttyra tústi. Olardyń arasynda meıiz qosylǵan Pasha bálishteri, súzbe pasha torty jáne boıalǵan jumyrtqalar bar.
— Bul keremet, men barsha qazaqstandyqty Pasha merekesimen quttyqtaımyn jáne olarǵa baqyt, jaqsylyq jáne bıik shyńdardy baǵyndyrýdy tileımin, — dep áserimen bólisti master-klass qatysýshylarynyń biri Kırıll Chernov.
Іs-shara Dostyq úıinde ótken merekelik kezdesýlerdiń jalǵasy boldy. Jaqynda munda Naýryz merekesi toılansa, endi túrli mádenıet ókilderi bir dastarhannyń basynda taǵy da bas qosty — bul joly Pasha merekesine oraı.
— Biz Qazaqstanda bar barlyq merekeni toılaımyz. Maqsat — barlyq etnosty bir shańyraq astyna biriktirý. Búgin bizge erekshe balalar kelip otyr, olardyń emotsııalaryna qaraǵanda bul is-shara olarǵa óte unady, — deıdi Dostyq úıi dırektorynyń orynbasary Kameta Ibraeva.
Uıymdastyrýshylardyń aıtýynsha, mundaı formatta Pasha sheberlik sabaǵy alǵash ret ótti. Ol Qazaqstan halqy assambleıasynyń 30 jyldyǵyna arnalǵan is-sharalardyń bir bóligi boldy. Josparda etnosaralyq birlikti nyǵaıtýǵa jáne toleranttylyq mádenıetin damytýǵa baǵyttalǵan jańa kezdesýler men shyǵarmashylyq sharalardy ótkizý bar.
Aıta ketelik Memleket basshysy barsha hrıstıandy Pasha merekesimen quttyqtady.