Astanada erekshe bilim berýdi qajet etetin balalar sany artyp keledi — Bilim basqarmasy

ASTANA. KAZINFORM — Elordada erekshe bilim berýdi qajet etetin balalar sany jyl saıyn artyp keledi. Psıhologııalyq-medıtsınalyq-pedagogıkalyq konsýltatsııanyń (PMPK) derekterine sáıkes, bıyl Astana qalasynda 22 myńnan astam bala osyndaı sanatqa engizilgen. Byltyr olardyń sany 19 597 bala bolǵan. 

Astana qalasy Bilim basqarmasynyń basshysy Qasymhan Senǵazyevtiń aıtýynsha, erekshe bilim alýshylardyń 75 paıyzy arnaıy psıhologııalyq-pedagogıkalyq qoldaýmen qamtylǵan.

— Sońǵy bes jylda qaladaǵy arnaıy bilim berý uıymdarynyń sany 6 birlikke artty. Qazirgi tańda elordada 24 arnaıy uıym jumys isteıdi. Onyń ishinde 10 psıhologııalyq-medıtsınalyq-pedagogıkalyq konsýltatsııa, 5 psıhologııalyq-pedagogıkalyq túzetý kabıneti, 3 arnaıy mektep, 3 arnaıy balabaqsha, 2 ońaltý ortalyǵy jáne 1 aýtızm ortalyǵy bar, — dedi Qasymhan Senǵazyev qalalyq máslıhattyń otyrysynda.

Onyń málimetinshe, qalada budan bólek 108 ınklıýzııany qoldaý kabıneti jumys isteıdi. Onyń 85-i mektepterde, 23-i balabaqshalarda ornalasqan.

— Astana qalasyndaǵy jalpy bilim beretin 119 mekteptiń barlyǵy búginde ınklıýzıvti bilim berý jaǵdaıymen tolyq qamtamasyz etilgen. Bul kórsetkish eki jyl buryn 85 paıyz ǵana bolǵan edi, — dep atap ótti basqarma basshysy.

Sondaı-aq ol tehnıkalyq jáne kásiptik bilim berý uıymdaryndaǵy ınklıýzıvti oqytý baǵytyndaǵy jumystar týraly da baıandady.

— Qaladaǵy 24 kolledjde erekshe bilim berýdi qajet etetin 334 stýdent bilim alyp jatyr. 2023 jyly — 93, 2024 jyly — 112, al 2025 jyly 125 stýdent qabyldandy. Qazirgi tańda 8 kolledjde osyndaı stýdentterge arnalǵan 8 mamandyq boıynsha arnaıy toptar jumys isteıdi, — dedi Qasymhan Senǵazyev.

Buǵan deıin erekshe bilim berýdi qajet etetin balalar úshin arnaıy oqý-ádistemelik quraldar tizbegi ázirlenetinin jazǵanbyz.