Astanada eń iri Kitap Fest jármeńkesi ótti
«Biz bul festıvaldi Qazaqstannyń barlyq aımaǵynda ótkizgimiz keledi, óıtkeni suranys bar. Qazirdiń ózinde kóp jumys jasaldy. Jańa Qazaqstanǵa bilimdi jastar qajet dep sanaımyn. Sondyqtan qoǵamda kitap oqýdy nasıhattaý óte mańyzdy. Elordanyń týǵan kúninde bizdiń festıval taǵy da kitapsúıer qaýymmen qaýyshty. Kitap Fest kitap áýesqoılary úshin ǵana emes, sonymen qatar úlken otbasylyq merekege aınaldy. Jyl saıyn biz balalar men eresekterge qyzyqty ári aýqymdy baǵdarlama usynamyz. Festıvalde ár adam ózine paıdaly jáne qyzyqty dúnıe tabady. Biz otandyq ádebıettiń damýyna óz úlesimizdi qosýǵa, jas jazýshylar men olardyń shyǵarylatyn kitaptaryn qoldaýǵa umtylamyz», - dedi Kitap FEST festıvaliniń bas úılestirýshisi Maıra Áljanova.
Kitap Fest 9 jyl ishinde shyǵarmashylyq-jazýshylyq kezdesýlerdiń bedeldi jáne qýatty alańyna, sondaı-aq otbasylyq merekege aınaldy. Bul jyldary belgili qazaqstandyq avtorlar men baspalardyń qatysýymen 300-den astam kitap tanystyryldy. Kitap Fest mádenı-aǵartýshylyq is-sharaǵa aınaldy, ol mıllıondaǵan kórermenderdiń súıispenshiligine ıe boldy.
Bıyl Astana kúnine oraı elordalyqtar úshin 10 saǵattyq kitap kórmesi, qazaqstandyq jazýshylarmen jáne pikir kóshbasshylarymen kezdesý jáne sheberlik saǵattary, konkýrstar men aktsııalar, balalarǵa arnalǵan oıyn-saýyq baǵdarlamasy men kitap jármeńkesi ótti. Eń kishkentaı kelýshilerdi túrli oıyndar, kvestter, sheberlik synyptary, anımatorlar qýantty. Sondaı-aq, qýyrshaq teatrynan «Aldar kóse» spektakli usynyldy.
Festıval qonaqtary ózderi ákelgen kitaptardy almastyrýǵa, unaǵan kitaptardy jeńildikpen satyp alýǵa nemese tegin alýǵa múmkindik aldy. Bıylǵy kitap festıvalinde túrli janrdaǵy 2000-ǵa jýyq tegin kitaptar taratyldy. Odan bólek, festıvalde «Aýylǵa kitap» aktsııasy ótti, onda árbir adam kitapty Qazaqstannyń aýyldyq kitaphanalaryna tapsyrýǵa múmkindik aldy.
Sonymen qatar, festıval aıasynda Áıgerim Musaǵajınova, Únzıla Myńbaı, Dınara Bolat, Záýre Tórehan, Perızat Myrzahmet jáne basqa da kóptegen jazýshylar men blogerler ózderiniń jańa kitaptaryn tanystyrdy. Kitap avtorlary qazirgi ádebıettegi ózgerip jatqan tendentsııa týraly aıtty. «Kitaptar týraly offlaın» shatyrynda tanymal jazýshylar, blogerler, psıhologtar óz tájirıbelerimen bólisti. Jas jazýshylar men baspagerler úshin kitaptardy nasıhattaýdyń qupııalary, avtorlyq quqyqty qorǵaý týraly dárister men semınarlar ótkizildi.
Mysaly, belgili qazaqstandyq jazýshy Záýre Tórehan óziniń «Kúıekóbelekter shahary» atty jańa kitabyn tanystyrdy. Ol kitapty Qazaqstanda jáne shetelde basyp shyǵarý joldary týraly aıtty.
Jazýshynyń pikirinshe, Kitap Fest shyǵarmashylyq kezdesýler úshin bedeldi jáne qýatty alańǵa aınaldy.
«Uıymdastyrýshylarǵa osyndaı keremet is-shara úshin úlken alǵys aıtqym keledi. Búgingi kitap festıvaline bizdiń maqsatty aýdıtorııamyzdyń kóp bóligi keldi desem bolady. Kóńil-kúı óte keremet, oqyrmandar qaýymymmen jolyǵyp pikir almasýǵa keremet múmkindik týdy», - deıdi jazýshy.
Jazýshy Dıana Batışeva 8 jasynda kitap jazý bolý jolyn aıtyp, balanyń jeke basynyń damýyndaǵy ádebıettiń róli týraly tájirıbesimen bólisti.
«Elimizde jazýshylarǵa ortaq alań quratyn osyndaı tamasha is sharalar kóp bolsa eken. Súıikti astanamyzdyń týǵan kúninde qala turǵyndary úshin kitap festıvali paıdaly ári qyzyqty merekege aınaldy. Qazaqstandyqtardy, ásirese jastardy kitap oqýǵa degen qyzyǵýshylyqtaryn arttyrý maqsatynda uıymdastyrylǵan bul festıvaldiń bolashaǵy zor dep oılaımyn»- dep atap ótti jazýshy.
