Astanada eldegi eń iri bos jumys oryndary jármeńkesi ótedi

ASTANA. KAZINFORM — Elordada jumysshy mamandyqtary jyly aıasynda 22 tamyzda jastarǵa arnalǵan elimizdegi eń iri bos jumys oryndary jármeńkesi ótedi. 

Іs-sharany «AMANAT» partııasynyń «Jastar Rýhy» jastar qanaty elorda ákimdigimen birlesip uıymdastyryp otyr. Negizgi maqsat — memlekettiń eń mańyzdy mindetteriniń biri — jastardy laıyqty jumyspen qamtý jáne adamı kapıtaldy damytý.

Jármeńke 22 tamyz kúni Kenesary kóshesi, 32 mekenjaıynda ornalasqan elordalyq E. Rahmadıev atyndaǵy memlekettik akademııalyq fılarmonııa ǵımaratynda ótedi.

Bul jármeńke jastar men bıznes arasyndaǵy tikeleı dıalog alańyna aınalyp, jas mamandarǵa ekonomıkanyń naqty sektorynda ózin kórsetýge múmkindik beredi.

Ártúrli saladan 70-ten astam jumys berýshi 1000-nan asa ózekti bos jumys ornyn usynady.

Qatysýshylardyń qatarynda elimizdiń jetekshi ulttyq kompanııalary bar: «KEGOC» AQ, «Qazaqtelekom» AQ, «DAR RAIL» JShS, «Home Credit Bank» AQ, «IntegraConstruction KZ» JShS, «Qazmedıa ortalyǵy» AQ, «Bogatyr Kómir» JShS, «Qazposhta» AQ, «Qazaqstan Halyq Banki» AQ, Astana Hub jáne basqa da iri uıymdar.

Jármeńkeniń ótýi júzdegen jas qazaqstandyqty jumyspen qamtýǵa ǵana emes, sonymen qatar jumysshy mamandyqtarynyń bedelin arttyrýǵa, básekege qabiletti urpaqty qalyptastyrýǵa jáne el ekonomıkasyn nyǵaıtýǵa qýatty serpin beredi. 

Aıta ketelik Astanada aýqymdy bos oryndar jármeńkesinde eki myń jumys orny usynylǵan edi.