Astanada eki kúndik Japon kınosynyń festıvali ashyldy

ASTANA. QazAqparat - Japon kınosy arqyly japondardy burynǵydan da jaqsy kóretin bolasyzdar. Bul týraly búgin Astanadaǵy Qazmedıa ortalyǵynda ashylǵan Japon fılmderi festıvalinde Japonııanyń Qazaqstandaǵy elshisi Masaesı Kamohara aıtty.

"Biz bıyl elorda turǵyndary men qonaqtaryn japon mádenıetimen jan-jaqty tanystyrdyq. Atap aıtar bolsaq, japon qýyrshaqtarynyń kórmesi, kórkem sýret konkýrsy jáne basqa da sharalar uıymdastyrdyq. Al búgingi japon kınosynyń festıvalinde usynyp otyrǵan fılmderimiz arqyly sizder japondardyń kúndelikti tirshiligimen, ómir saltymen tanysa alasyzdar. Sol fılmder arqyly japon halqyn burynǵydan da jaqsy kóretin bolasyzdar", - dedi elshi.

Aıta keteıik, osymen ekinshi ret uıymdastyrylyp otyrǵan shara barysynda (10-11 qazan) japon rejısserleri túsirgen 4 kórkem fılm kórermen nazaryna usynylady. Festıvaldi "Svıng gerlz" (Swing girls, Japonııanyń kıno akademııasynyń eń úzdik jyl fılmi syılyǵynyń ıegeri) atty jastarǵa arnalǵan komedııasy ashyp berdi. Fılmde Japonııanyń túkpirindegi mektep oqýshylarynyń ómiri sýrettelgen.

Japon kınosynyń ekinshi kúni erteń saǵat 13:00-de bastalady. Kórermen bul kúni qatarynan úsh fılm kóre alady.