Nashaqorlyq máselesi sahnada: Astanada «Eki ǵumyr» spektakli kórsetildi
ASTANA. KAZINFORM — Astanada Mýzykalyq jas kórermen teatry «Zań men tártip» qaǵıdaty aıasynda «Eki ǵumyr» spektaklin usyndy. Qoıylymdy kórermendermen birge elordanyń sportshylary tamashalady, dep habarlaıdy qala ákimdiginiń resmı saıty.
Drama janryndaǵy týyndy jýyrda túbegeıli jańartyldy. Pesaǵa ózgerister engizildi. Bylaısha aıtqanda, mátinge óńdeý júrgizildi. Al áserin kúsheıtý úshin mýzykalyq hor qosyldy.
Avtorlary Qolqanat Murat pen Ashat Moldaǵalı búgingi ózekti taqyryp nashaqorlyq máselesi men jastar ómirin shyǵarmaǵa arqaý etti. Al sahnalyq nusqasyn týyndynyń qoıýshy rejısseri, Qazaqstannyń eńbek sińirgen qaıratkeri Ashat Maemırov jasady. Rejısseri — Baýyrjan Nurbaı.
Bul qoıylym ar-ojdan men shyndyqtyń, adam men ortanyń arasyndaǵy shynaıy qaqtyǵysty sýretteıdi.
— Elimizde Memleket basshysynyń bastamasymen «Zań men tártip» qaǵıdaty qolǵa alyndy. Bul baǵdarlama árbir salada óziniń ómirsheńdigin dáleldep kele jatyr. Al teatr, kıno bolsyn sol arqyly qoǵamdaǵy ózekti máselelerge ún qosýymyz kerek. Spektakldiń qozǵaıtyny da — búgingi qoǵam dertine aınalǵan nashaqorlyq máselesi. «Eki ǵumyrda» nashaqorlyqqa ushyraǵan bir otbasy músheleriniń taǵdyry arqaý etilgen. Ul nemese qyz nashaǵa táýeldi bolsa, ákeniń jaǵdaıy qalaı bolady, ananyń ishki ókinishi, jansaraıyndaǵy tebirenis, tolǵanysy qalaı bolady? Spektakl osy jóninde syr tarqatady. Qoǵamdy tek qana rýhy bıik óskeleń urpaq alǵa qaraı jetelep otyrady. Jastar salaýatty ómir saltymen qarýlanyp, olardyń boıynda adamgershilik, asyl qasıetter bolǵan jaǵdaıda ǵana elimiz bıik belesterdi baǵyndyrady. Spektakl osyndaı ıdeıany úndeıdi, — deıdi qoıylymnyń qoıýshy rejısseri Ashat Maemırov.
Budan buryn Astanada jasandy ıntellektiniń kómegimen jasalǵan alǵashqy spektakl qoıylǵanyn jazǵanbyz.