Astanada dúnıejúzilik kóshpendiler oıyndarynyń saltanatty ashylýy bastaldy
ASTANA. KAZINFORM – «Astana Arena» stadıonynda V dúnıejúzilik kóshpendiler oıyndarynyń saltanatty ashylý rásimi ótip jatyr. Aldymen úlken ekranda «Qosh keldińizder!» degen sóz shyqty. Sonymen qatar memlekettik Tý shyǵarylyp, Ánuran oryndaldy.
Aıtýly sharanyń mártebeli qonaqtary qatarynda QR Prezıdenti Qasym-Jomart Toqaev, Ózbekstan Respýblıkasynyń Prezıdenti Shavkat Mırzıeev, Qyrǵyzstan Respýblıkasynyń Prezıdenti Sadyr Japarov, Túrikmenstan Halk Maslahatynyń tóraǵasy Gýrbangýly Berdimuhamedov, Tatarstan Raısy Rýstam Mınnıhanov, Saha Respýblıkasynyń basshysy Aısen Nıkolaev, Mońǵolııanyń III Prezıdenti Nambaryn Enhbaıar bar.
Dúnıejúzilik kóshpendiler oıyndarynyń ashylý saltanatyna 20 myń kórermen jınalǵan.
Aldaǵy eki saǵat boıy 3 myń ónerpaz óner kórsetedi. Qatysýshylar arasynda elimizdiń túrli óńirinen mádenıet salasynyń ókilderi, Mádenıet jáne aqparat mınıstrligine qarasty mekemelerdiń ártisteri bar.
Elimizde dúnıejúzilik kóshpendiler oıyndaryna daıyndalý jáne ótkizý maqsatynda QR Premer-Mınıstri orynbasarynyń tóraǵalyǵymen arnaıy komıtet quryldy. Búgin bastalǵan dúnıejúzilik kóshpendiler oıyndary «Astana Arena» stadıony, «Qazanat» ıppodromy, J.Úshkempirov atyndaǵy jekpe-jek saraıy, «Alaý» muz saraıy, «Qazaqstan» jeńil atletıka sport kesheni, «Dýman» kesheni sııaqty 6 nysanda ótedi.
Ashylý saltanatyn «Qazaqstan», «Qazsport», «Habar», «El arna», «Jibek Joly», «Silk Way», «Sport Plus» arnalarymen qatar, Túrkııanyń TRT AVAZ arnasy, Qyrǵyzstannyń 5 telearnasy, halyqaralyq «Mır», «Mır 24» arnalary, Reseıdiń «Start LIVE» sport arnasy, Tatarstannyń «TNV Qazan» telearnasy, Ózbekstan men Túrikmenstannyń memlekettik arnalary tikeleı efırde kórsetip jatyr.
QR Mádenıet jáne aqparat mınıstrliginiń málimetinshe, dúnıejúzilik kóshpendiler oıyndary tarıhynda bundaı halyqaralyq deńgeıde aýqymdy telehabar taratý birinshi ret qolǵa alynyp otyr.
Aıta ketsek, dúnıejúzilik kóshpendiler oıyndary alǵash ret Qyrǵyzstanda ótti.
