Astanada dıplomatııalyq korpýsqa arnalǵan «Naýryz baly» ótti
ASTANA.KAZINFORM - Astanada Qazaqstandaǵy dıplomatııalyq korpýs ókilderi, halyqaralyq uıymdar men sheteldik seriktes qurylymdar qatysqan «Naýryz baly» ótti. Merekelik is-sharany Qazaqstan Mádenıet jáne aqparat mınıstrligi dástúrli túrde uıymdastyryp keledi.
Atalǵan bal Memleket basshysynyń bastamasymen 2024 jyly bekitilgen «Naýryznama» onkúndigi aıasynda Mádenıet jáne ulttyq salt-dástúr kúnine oraı uıymdastyryldy. Іs-shara mádenı jáne gýmanıtarlyq baılanystardy nyǵaıtýǵa yqpal etip, Qazaqstannyń baı tarıhı-mádenı murasy men ulttyq dástúrine, qazirgi qoǵamdyq damýyna erekshe nazar aýdaryldy.
Dıplomattar úshin jármeńke uıymdastyryldy. Bul is-shara tabıǵat jańaryp, molshylyq artatyn, Ulystyń uly kúni – Naýryz merekesiniń máni men maǵynasyn tereń túsinýge sep boldy. Qonaqtar arqan tartys, asyq atý jáne basqa da ulttyq oıyndarǵa qatysyp, qazaq mádenıetin jaqynyraq tanı tústi.
Іs-sharada Premer-mınıstr orynbasary – Mádenıet jáne aqparat mınıstri Aıda Balaeva bıylǵy Naýryz merekesi el úshin mańyzdy kezeńmen tuspa-tus kelgenin atap ótti.
– Bıylǵy Naýryz elimiz úshin mańyzdy tarıhı kezeńmen tuspa-tus kelip otyr. Kúni keshe ótken respýblıkalyq referendýmda halqymyz jańa Ata zań úshin tańdaý jasap, el damýynyń jańa baǵytyn aıqyndady. Halqymyz ádiletti, progressıvti, bilim men ǵylymǵa, ınnovatsııaǵa negizdelgen bolashaq úshin daýys berdi. Zań men tártip saqtalatyn, barshaǵa teń múmkindik beretin ádiletti qoǵam qalyptastyrý jolynda tarıhı sheshim qabyldadyq. Referendýmǵa belsendi qatysqan halyq el taǵdyryna beıjaı qaramaıtynyn, erteńge degen jaýapkershilikti tereń sezinetinin kórsetti. Bul – birligi bekem, bolashaǵyna senimdi qoǵamynyń aıqyn kórinisi. Elimiz úshin ýaqyt talabyna saı jasalǵan bul tarıhı qadam memlekettik júıeni ınstıtýtsıonaldyq turǵydan jańǵyrtýǵa jol ashady. Bul – Qazaqstannyń demokratııalyq damý jolyndaǵy taǵy bir mańyzdy belesi. Osylaısha, Qazaqstan jańa dáýirge, jańa kezeńge nyq qadam basty. Bul Naýryz meıramynyń jańarý men jańǵyrýdy bildiretin tereń sımvoldyq mánimen úndesip jatyr, – dedi Aıda Balaeva.
Sonymen qatar Premer-mınıstrdiń orynbasary jańa Konstıtýtsııada qoǵam damýynyń jańa qundylyqtary bekitilgenin atap ótti. Alǵash ret tarıhı-mádenı murany saqtaý jáne tól mádenıetti ulyqtaý memleket damýynyń negizgi qaǵıdattarynyń biri retinde aıqyndaldy.
– Ulttyq biregeılikti saqtaý, tarıhı sabaqtastyqty úzbeý jáne mádenı kodty keler urpaqqa aman jetkizý – konstıtýtsııalyq normalardyń túpki máni. Óıtkeni mádenı mura – ótkenniń esteligi ǵana emes, eldiń rýhanı tiregi, qoǵamdy biriktiretin qundylyqtardyń negizi. Azamattardyń tarıhı jáne mádenı muraǵa qamqorlyq jasaý mindetiniń bekitilýi de qoǵamnyń mádenı jaýapkershiligin kúsheıtedi. Sonymen qatar elimizdiń damý joly «birlik pen yntymaq, etnosaralyq jáne konfessııaaralyq tatýlyq qaǵıdattaryna súıenetini» Jańa Konstıtýtsııanyń Preambýlasynda anyq bekitildi. Bul qaǵıdattar Qazaqstan qoǵamynyń basty tirekteriniń biri bolyp qala beredi jáne kópetnosty, kópkonfessııaly elimizdiń turaqty damýynyń berik negizin qalyptastyrady. Elimiz qaı kezde de halyqtar arasyndaǵy dostyq pen órkenıetter dıalogyn damytýǵa basymdyq berip keledi. Osy rette dostyq pen tatýlyqtyń altyn kópirine aınalǵan dıplomatııalyq korpýs ókilderine erekshe alǵys bildirgim keledi. Qazaqstanda qyzmet atqaryp júrgen sheteldik elshiler bizdiń mádenıetimizge, dástúrimizge, tilimizge zor qyzyǵýshylyq tanytyp qana qoımaı, olardy halyqaralyq arenada nasıhattaýǵa da úlken úles qosyp keledi. Sondyqtan birligimizdi bekemdeýde barshańyzdyń eseli eńbekterińiz aıryqsha zor dep bilemin, – dep atap ótti Úkimet basshysynyń orynbasary.
Іs-sharada Syrtqy ister mınıstri orynbasary Álibek Baqaev quttyqtaý sóz sóıledi. Ol óz sózinde Naýryz merekesiniń mádenı dıplomatııadaǵy mańyzdy rólin atap ótip, bul meıram halyqtardy jaqyndastyryp, memleketter arasyndaǵy ózara túsinistikti nyǵaıtatynyn aıtty. Onyń pikirinshe, jańarý men jasampazdyqty bildiretin bul mereke – halyqaralyq yntymaqtastyq pen tatýlyqtyń jarqyn kórinisi.
Aıta keteıik, jýannyń jińishkerip, jińishkeniń úziler shaǵynda muqym el kóneden atap ótetin Naýryz meıramynyń qandaı dástúrleri saqtalyp, qaısysy jańaryp, túrlengeni jaıly Kazinform agenttiginiń tilshisi zerdelep kórdi.