Astanada Denıs Tenmen qoshtasý rásimi ótedi
21 shilde kúni tańǵy 10-da «Barys-Arena» sport saraıynda tanymal mánerlep syrǵanaýshy, eńbek sińirgen sport qaıratkeri, 2014 jylǵy Olımpıada oıyndarynyń qola júldegeri Denıs Tenmen qoshtasý rásimi ótedi. Oǵan sport qaýymdastyǵy ókilderi, bapkerler men qarapaıym qala turǵyndary qatysa alady. Shara Almatydaǵy janazamen qatar ótkiziledi», - delingen QR Mádenıet jáne sport mınıstrligi Sport jáne dene tárbıesi isteri komıtetiniń resmı habarlamasynda.
Aıta keteıik, 21 shilde kúni Almatyda Denıs Tendi aqtyq saparǵa shyǵaryp salý sharasy Balýan Sholaq sport saraıynda ótedi.
Qazaqstandyq mánerlep syrǵanaýshy Denıs Ten 19 shilde kúni pyshaq jaraqatynan qaza bolǵan edi. Oqıǵa Qurmanǵazy Baıseıitova kósheleriniń qıylysynda 19 shildede túski saǵat 15:00 shamasynda bolǵan. Sportshy kóliginiń aınasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh lıtr qan joǵaltyp, aýrýhanaǵa óte aýyr jaǵdaıda jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsınov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanımatsııalyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olımpıada júldegeri qaıtys boldy.
Adam óltirý babymen qylmystyq is qozǵaldy.
Búgin belgili bolǵandaı, sportshynyń ólimine qatysy bar eki kúdiktiniń biri ustalyp, ol qylmysyn moıyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqaı aýylynyń týmasy Arman Qudaıbergenovke izdeý jarııalandy.
