Astanada DDU koalıtsııasynyń hatshylyǵy ashylýy múmkin
ASTANA. KAZINFORM - Bul týraly 79-shy Dúnıejúzilik densaýlyq saqtaý assambleıasynyń alańynda Qazaqstan Respýblıkasynyń Densaýlyq saqtaý mınıstri Aqmaral Álnazarovanyń Dúnıejúzilik densaýlyq saqtaý uıymynyń Bas dırektory Tedros Adhanom Gebreıesýspen kezdesýi barysynda málim boldy.
Taraptar kezdesý barysynda medıtsınalyq-sanıtarııalyq alǵashqy kómekti damytýdy, densaýlyq saqtaý júıeleriniń turaqtylyǵyn nyǵaıtýdy, Ortalyq Azııanyń óńirlik kún tártibin ilgeriletýdi, sondaı-aq Qazaqstannyń medıtsınalyq uıymdary men halyqaralyq áriptesterdiń arasyndaǵy praktıkalyq ózara is-qımyldy keńeıtýdi qosa alǵanda, odan ári yntymaqtastyqtyń basym baǵyttaryn talqylady.
QR Densaýlyq saqtaý mınıstri DDU basshylyǵyna Qazaqstannyń bastamalaryn dáıekti qoldaǵany úshin alǵys aıtyp, DDU basshysynyń aǵymdaǵy jyldyń sáýir aıynda Astanada ótken óńirlik ekologııalyq sammıtke qatysqanyn atap ótti.
Kelissózderdiń negizgi taqyryptarynyń biri elderdiń medıtsınalyq-sanıtarlyq alǵashqy kómek jónindegi jahandyq koalıtsııasyn odan ári damytý boldy. Qazaqstan koalıtsııany saıası dıalog, tájirıbe almasý jáne densaýlyq saqtaýdyń bastapqy býynynyń reformalaryn qoldaý úshin halyqaralyq platforma retinde ilgeriletýdi jalǵastyrýǵa daıyn ekenin rastady.
-Qazaqstan úshin medıtsınalyq-sanıtarııalyq alǵashqy kómektiń densaýlyq saqtaýdyń jahandyq kún tártibiniń ortalyǵynda qalýy túbegeıli mańyzdy. Biz elderdiń MSAK jónindegi jahandyq koalıtsııany damytýdy densaýlyq saqtaý júıeleriniń turaqtylyǵyn nyǵaıtýdyń jáne halyq úshin medıtsınalyq kómektiń qoljetimdiligin arttyrýdyń praktıkalyq tetigi retinde qarastyramyz», – dep atap ótti Aqmaral Álnazarova.
Kezdesý barysynda Astanada Salıdat Qaıyrbekova atyndaǵy Ulttyq ǵylymı densaýlyq saqtaýdy damytý ortalyǵynyń bazasynda Koalıtsııa Hatshylyǵyn qurý, sondaı-aq WHO Twinning Partnerships for Improvement bastamasy sheńberinde medıtsınalyq uıymdardyń arasyndaǵy áriptestik formatyn damytý máseleleri talqylandy.
Qazaqstandyq tarap MSAK, kardıologııa, kardıohırýrgııa, ftızıopýlmonologııa jáne ınfektsııalyq qaýipsizdik salasyndaǵy jobalardy qosa alǵanda, jetekshi ulttyq ortalyqtarmen yntymaqtastyqty keńeıtý jóninde usynystar usyndy.
Taraptar DDU-nyń Almatydaǵy MSAK boıynsha geografııalyq qashyqtaǵy ofısin odan ári damytýǵa erekshe nazar aýdardy, ol jumys istegen jyldary DDU-nyń Eýropalyq óńirinde medıtsınalyq-sanıtarııalyq alǵashqy kómek tásilderin ilgeriletý jónindegi negizgi halyqaralyq alańdardyń birine aınaldy.
Sondaı-aq 2026-2030 jyldarǵa arnalǵan Ortalyq Azııadaǵy densaýlyq pen ál-aýqatty qoldaý jónindegi Jol kartasyn iske asyrý, sondaı-aq Almaty deklaratsııasynyń 50 jyldyǵyna jáne Astana deklaratsııasynyń 10 jyldyǵyna arnalǵan 2028 jylǵy mereıtoılyq is-sharalarǵa daıyndyq máseleleri talqylandy.
QR Densaýlyq saqtaý mınıstri DDU-nyń Qazaqstannyń dárilik zattardy retteý júıesiniń-TMD elderiniń arasynda birinshi jáne DDU-nyń eýropalyq óńirdegi tórtinshi jetilýiniń úshinshi deńgeıine jetýine qoldaýyn atap ótti.
Kezdesý qorytyndysy boıynsha taraptar strategııalyq áriptestikti odan ári nyǵaıtýǵa jáne qoǵamdyq densaýlyq saqtaý salasyndaǵy birlesken bastamalardy iske asyrýǵa múddeliligin rastady.
Osyǵan deıin Ortalyq Azııa elderi men DDU 2026–2030 Jol kartasyn iske asyrý tetikterin qarastyrǵany týraly jazdyq.
