Astanada bıikten qulap ketken taǵy bir alpınıst qaıtys boldy

Elordanyń densaýlyq saqtaý basqarmasy keshe qurylys alańynda zardap shekken alpınısterdiń jaı-kúıin baıandady, dep habarlaıdy Kazinform. 

12 qazan kúni astanalyq turǵyn úı kesheniniń qurylysynda 4 alpınıst bıikten qulap, bireýi oqıǵa ornynda kóz jumǵan edi.

Qalǵan úsheýi oqıǵa ornynan №2 qalalyq aýrýhanaǵa jetkizilgen.

Úsheýine de jumsaq tin jaraqaty, qabyrǵalarynyń, jambas súıekteriniń synýy, ishki aǵzalardyń jaraqaty, joǵary dárejeli shok jáne travmatıkalyq jaı-kúı dıagnozy qoıylǵan.

Zardap shekkender birden qarqyndy terapııa palatalaryna ornalastyrylǵan, alynǵan jaraqattar boıynsha jedel emdeý júrgizilgen.

«Alaıda kóptegen jaraqat saldarynan ekinshi alpınıst – 1999 jyly týǵan er adam 12 qazan kúni 17.40-ta qaıtys boldy. Búgingi jaǵdaı boıynsha 1999 jáne 2002 jyly týǵan eki alpınıst reanımatsııa jáne qarqyndy terapııa bóliminde óte aýyr jaǵdaıda jatyr», - dep habarlady basqarma.

Óz kezeginde Astana ákimdigi de jaǵdaıǵa pikir bildirip, «Altyn besik» turǵyn úı keshenindegi búkil qurylys-montaj jumystary toqtaǵanyn aıtty.

«Qalalyq orta sapasy jáne baqylaý basqarmasy atalǵan apatty tekserý úshin komıssııa qurdy. Nátıjeleri boıynsha apattyń sebepteri men jaýapty tulǵalar anyqtalady. Tergeý qorytyndysy boıynsha materıaldar protsessýaldyq sheshim qabyldaý úshin polıtsııa departamentine joldanady», - dep jazylǵan ákimdiktiń resmı jaýabynda.