Astanada bıyl stýdentterge arnalǵan 8 jataqhana ashylady
ASTANA. KAZINFORM — Astana qalasynyń ákimi Jeńis Qasymbek Instagram-daǵy paraqshasynda stýdentter jataqhanasynyń máselesi qalaı sheshilip jatqany týraly jazdy.
Onyń sózinshe, Astanaǵa ózge qalalardan keletin stýdentterdiń sany jyl saıyn artyp keledi.
— Oqý jylynyń bastalýyna eki aptanyń kólemindeı ǵana ýaqyt qaldy. Áleýmettik nysandardy ashýǵa daıyndap otyrmyz. Ózderińiz biletindeı, ózge qalalardan keletin stýdentterdiń sany jyl saıyn artyp keledi. Salalyq mınıstrlikpen, ýnıversıtettermen jáne ınvestorlarmen birlese otyryp, jataqhana oryndaryn kóbeıtý baǵytynda jumys istep jatyrmyz. Ǵylym jáne joǵary bilim mınıstri Saıasat Nurbekpen birge jańa oqý jyly qarsańynda ashylatyn 400 oryndyq stýdenttik jataqhanaǵa (A.Pýshkın kóshesi, 13a) bardyq. Atalmysh áleýmettik nysan jeke ınvestıtsııa esebinen salyndy, — dedi ákim.
Jeńis Qasymbek elordada 2025 jyldyń basynan beri shamamen 2 myń 700 oryndyq jataqhana paıdalanýǵa berilgenin atap ótti. Jyl sońyna deıin 2 060 orynǵa arnalǵan taǵy 7 nysandy ashý josparlanyp otyr.
— Osylaısha, 2025 jyly jalpy syıymdylyǵy 4 716 oryndyq 8 stýdenttik jataqhana paıdalanýǵa beriledi. Ótken jyly elordada jalpy syıymdylyǵy shamamen 1 700 orynǵa arnalǵan 5 stýdenttik jataqhana paıdalanýǵa berildi. Sonymen qatar, jańa oqý jyly ishinde 15 mektep ashamyz, onyń 7-eýi «Jaıly mektep» ulttyq jobasy aıasynda salynady. Bul bilim berý nysandary eki aýysymda 28 myń oqýshy ornyn ashýǵa múmkindik beredi. Sol sııaqty elordada balabaqshalar, oqýshylar saraıy jáne basqa da áleýmettik nysandar salynyp jatyr, — dep jazdy Jeńis Qasymbek.
Buǵan deıin habarlanǵandaı, Dúnıejúzilik EXPO-2025 kórmesinde Astananyń týrıstik áleýeti kórsetildi.