Astanada beıbit atomnyń «qýaty» men ekologııalyq tazalyǵy kórsetildi

ASTANA. KAZINFORM – 25 qyrkúıekte Astananyń ortalyq saıabaǵynda atom ónerkásibin damytý qaýymdastyǵynyń ókilderi beıbit atomnyń tıimdiligin kórsetýge arnalǵan shaǵyn sáýlettik nysandy ornatty. Іs-shara 28 qyrkúıekte atalyp ótetin Atom salasy qyzmetkerleriniń kúnine oraılastyryldy.

Atom ónerkásibin damytý qaýymdastyǵy uıymdastyrǵan «Kómirdiń ornyna atom» atty biregeı aktsııa munaı men kómir sekildi energııa óndirýdiń basqa dástúrli kózderimen salystyrǵanda atom energııasynyń artyqshylyqtaryn kórsetýge baǵyttalǵan.

Qaýymdastyq ókilderi salmaǵy 4,5 gramm bir ýran tabletkasyn, 350 lıtr munaıy bar bóshkelerdi jáne 400 kılogramm tas kómiri salynǵan stendti ornatty.

«Bul adam ómiri men densaýlyǵyna qaýipsiz, tómen baıytylǵan ýrany bar, salmaǵy nebári 4,5 gramm bolatyn ýran tabletkasynyń naqpishini. Bir qaraǵanda eleýsiz bolyp kóringenimen, onyń quramynda orasan zor energııalyq áleýet bar», - deıdi qaýymdastyqtyń menedjeri Sofıa Kýrıı. 

Bir ýran tabletkasy beretindeı energııany óndirý úshin 350 lıtr munaı nemese 400 kılogramm kómir qajet bolady.

Іs-sharanyń basty maqsaty, spıkerdiń aıtýynsha, ıadrolyq otynnyń joǵary energııa tyǵyzdyǵyn ǵana emes, sonymen birge onyń ekologııalyq tazalyǵyn kórsetý boldy.

«Mamandardyń baǵalaýynsha, salmaǵy 4,5 gramm bir ýran tabletkasyn qoldanǵanda atmosferaǵa shamamen 20 gramm kómirqyshqyl gazy (SO2) bólinedi. 350 lıtr munaı jaǵylǵanda atmosferaǵa shamamen 900 kılogramm SO2 bólinedi. Kómirdiń zııany odan da kóp – 400 kg kómir shamamen 1000 kg kómirqyshqyl gazyn shyǵarady, onyń shamadan tys mólsheri bizdiń qorshaǵan ortanyń nasharlaýyna ákeledi», - dep atap ótti Kýrıı.

Qaýymdastyq ókili atom energetıkasy jaı ǵana balama emes, bolashaqtyń tehnologııasy ekenine toqtaldy. Ol qazaqstandyqtardy bolashaq urpaqqa jer sharyn taza qaldyrý úshin onyń múmkindikterine nazar aýdarýǵa shaqyrdy.

«Bul aqparatty áleýmettik jelilerde bólisińizder. Atom energııasynyń joǵary tehnologııalyq jáne ekologııalyq tazalyǵy týraly múmkindiginshe kóp adam bilsin. Biz birge taza jáne turaqty energetıkalyq bolashaqqa qadam jasaı alamyz», - dep qorytyndylady Sofıa Kýrıı.