Astanada báıgeden el birinshiliginiń irikteý kezeńi ótedi

ASTANA. QazAqparat - Astana qalasynyń ıppodromynda 5 tamyz kúni saǵat 10:00-de «Báıge Federatsııasy» qoǵamdyq birlestigi uıymdastyryp otyrǵan V Báıgeden Qazaqstan Chempıonaty – irikteý kezeńi ótedi, dep habarlaıdy QazAqparat elorda ákimdigine silteme jasap.

El birinshiligi Astana qalasynyń ákimdigi men QR Ulttyq sport túrleri qaýymdastyǵynyń uıytqy bolýymen ótkizilmek.

Shoqtyǵy bıik ulttyq sport jankúıerleri men kásibı sportshylardyń júregin jaýlap alatyn oqıǵa Astana qalasynyń ıppodromynda ótedi.

Shabandozdar ártúrli júlde men fınaldyq saıysqa beriletin joldamany utyp alý úshin ótkiziletin jarys aıasynda óz sheberligi men kásibı deńgeıin kórsetý múmkindigine ıe bolady.

Týrnır at jarysynyń qunan báıge, top báıge, alaman báıge jáne jorǵa jarys sııaqty tórt túri boıynsha ótedi, jalpy júlde qory – 23,5 mln teńge.

Іs-shara aıasynda oıyn-saýyq baǵdarlamalary uıymdastyrylady.

Aıtalyq qyz-kelinshekter arasynda «Ulttyq kıim – ult ajary» degen atpen baıqaý ótkiziledi.

Júlde qory – 1 mln teńge.

Baıqaýǵa qatysýshylar kórermen nazaryna óz qolymen tikken, biregeı kıimderin usynýy tıis.

Sondaı-aq kórermen arasynda ártúrli júlde oınatylady, júlde qory – 3 mln teńge.