Astanada balalarǵa arnalǵan jınaq shyǵaryldy
Balalar jınaǵy óskeleń urpaqty qazaq ádebı tilin úırenýge, rýhanı qundylyqtardy qasterleýge baýlý, olardyń shyǵarmashylyq jáne ıntellektýaldy qabiletterin arttyrý maqsatynda shyǵarylyp otyr.
«Tátti alma» jınaǵynyń 1-2 tomy 2015 jyly Qazaqstan Respýblıkasynyń Prezıdenti N.Á.Nazarbaevtyń Memlekettik tildi damytý qoryna ana tilimizdi damytý baǵytyndaǵy jobalarǵa bólingen qarjysyna jaryq kórgen bolatyn. Osy jınaqtyń 3-4 tomdaryn shyǵarýǵa Qazaqstan Respýblıkasy Tuńǵysh Prezıdenti - Elbasynyń qory qoldaý kórsetti.
Sońǵy jınaqtarǵa jaqsylyq pen ásemdik, tabıǵatqa degen qamqorshylyq týraly ertegiler men teatrlyq qoıylymdar engen. Kitapqa engen shyǵarmalardy Tattialma.kz saıtynan oqýǵa bolady.
Іs-sharaǵa QR Tuńǵysh Prezıdenti - Elbasy qory atqarýshy dırektorynyń orynbasary - Sultan Aıtjanov, Memlekettik tildi damytý qorynyń dırektory Azat Sháýeev, qurastyrýshylar - balalar jazýshysy Sháken Kúmisbaıuly men aqyn Aqberen Elgezek, sondaı-aq belgili qoǵam qaıratkerleri men oqýshylar qatysty.
Jınaqtyń arnaıy tanystyrylymyna jınalǵan qaýym «Balapan» telearnasy jas daryndarynyń ónerin tamashalady. Jas ónerpazdar jańa jınaqqa engen teatrlyq qoıylymdardy oryndap, óleńder oqydy jáne án aıtty.
Іs-shara sońynda balalarǵa merekelik dastarqan jaıylyp, «Tátti alma» jınaǵy men alma syıǵa tartyldy.
Tusaýkeser rásimin ótkizýge «Balapan» telearnasy aqparattyq qoldaý kórsetti.
Aıta keterligi, atalmysh qor Prezıdent ıdeıalary men saıasatyn júzege asyrýǵa, talantty jastardy qoldaýǵa, áleýmettik jobalar men azamattyq bastamalardy damytýǵa, básekege qabiletti saraptama-taldaý ortalyǵyn damytýǵa baǵyttalǵan.
Kóptegen jyldar boıy qor daryndy jastarǵa qoldaý kórsetip keledi. 2016 jyly 73 is-shara júzege asyryldy. Olardyń ishinde jastardy qoldaýǵa arnalǵan 42 joba, áleýmettik baǵyttaǵy 31 joba qoldaý tapty.
