Astanada balalardy balabaqsha toptaryna jınaqtaý qashan bastalatyny belgili boldy
ASTANA. KAZINFORM - Elordada mektepke deıingi bilim berý mekemelerinde 2025-2026 jańa oqý jylyna arnalǵan toptardy jınaqtaý jumystary bastaldy, dep habarlaıdy elorda ákimdiginiń resmı saıty.
Bul týraly Astana qalasynyń Kommýnıkatsııalar qyzmetiniń alańynda ótken baspasóz konferentsııasynda Astana qalasy Bilim basqarmasy basshysynyń orynbasary Serik Ádilbaev málimdedi.
Qazirgi ýaqytta elordada 653 mektepke deıingi uıym jumys isteıdi. Onyń ishinde 99-y – memlekettik, 551-i – jekemenshik, 3-eýi – vedomstvolyq balabaqsha. Barlyǵy 66 281 bala mektepke deıingi tárbıe men oqytýmen qamtylǵan.
2025 jyldyń 1 shilde aıynan bastap Astana qalasynda balabaqshalardy toptastyrý jumystary bastalady. Bul rette 2 jastan 5 jasqa deıingi balalar úshin 15 myńnan astam bos oryn qarastyrylyp otyr.
Osy jyldyń qańtar aıynan bastap Astana qalasynda vaýcherlik qarjylandyrý júıesi negizinde mektepke deıingi uıymdarǵa balalardy qabyldaýǵa arnalǵan pılottyq joba iske qosyldy. Bul arqyly ata-analar balabaqshalardy tańdap, balasyn onlaın túrde ornalastyrý múmkindigine ıe boldy. Jyl basynan beri 6 703 balaǵa vaýcher berilip, balabaqshalarǵa qabyldandy.
Jańa júıeniń arqasynda balabaqsha kezegi 40 myńnan 30 myńǵa deıin qysqardy. Vaýcherlerdi bólý kezegi 1 shildede jańartylady.
Ata-analar INDIGO júıesinde óz jeke kabınetterine kirip, ótinishtiń kezekte turǵanyn tekserýi, balanyń qujattaryn daıyndap qoıýy jáne ed24.kz mobıldi qosymshasynda tirkelýi tıis. Balabaqshaǵa qajetti medıtsınalyq qujattardy aldyn ala daıyndap qoıǵan jón. Bul balabaqshalarǵa qabyldaý úderisin jedeldetedi.
20 maýsymnan bastap INDIGO portalynda vaýcher berý, balabaqshaǵa qabyldaý jáne oryn aýysyý, kútý paraqtarynyń jumysy ýaqytsha toqtatyldy. 20-30 maýsym aralyǵynda balabaqshalar balalardy mektepke shyǵaryp, jańa toptarǵa daıyndyq júrgizedi. 1 shilde kúni saǵat 18:00-de júıe jańartylyp, vaýcherler men qabyldaý protsesi qaıta iske qosylady.
Balalardy balabaqshaǵa qabyldaý kezinde tómendegi mańyzdy talaptarǵa nazar aýdarýlaryńyzdy suraımyz:
Eger balabaqshada ekpesi joq balalardyń úlesi 10%-dan assa, mekeme epıdemıologııalyq qaýipsizdikke baılanysty qosymsha ekpesi joq balany qabyldaýdan mindetti túrde bas tartýy tıis. Qabyldaýdan dáleldi bas tartý QR Oqý-aǵartý mınıstriniń №372 buıryǵymen qatań retteledi, bul normadan tys sheshim qabyldaýǵa jol berilmeıdi. Eger ótinimde qate qujattar tirkelse, balabaqsha ony «Indigo» júıesi arqyly ata-anaǵa qaıta pysyqtaýǵa jiberedi. Qabyldaý protsesi toqtamaıdy, qujattar túzetilgen soń qaıta engiziledi.
Qalanyń barlyq 6 aýdanynda qosymsha keńes berý pýnktteri ashyldy. Qazirgi tańda 7 myńnan astam ata-ana men balaǵa keńes berildi. Bul pýnktterde vaýcher kezegine turý, oryn alý, balabaqshamen kelisimshart jasaý máseleleri boıynsha naqty kómek kórsetilýde.
Jınaqtaý protsesiniń barynsha ashyqtyǵyn qamtamasyz etý maqsatynda aqparattyq júıede ata-analarǵa arnalǵan «Oryndardy bosatý hattamasy» jáne «Joldamalardy berý hattamasy» sekildi ashyq derekter qoljetimdi. Barlyq aqparat Bilim basqarmasynyń resmı saıtynda jáne ed24.kz qosymshasynda ornalastyrylǵan.
INDIGO elektrondy júıesi arqyly arnaıy toptarǵa, balabaqshalarǵa joldama alý múmkindigi de qarastyrylǵan.
Qosymsha aqparat jáne keńes alý úshin: ed24.kz mobıldi qosymshasyna kire alasyz, INDIGO júıesindegi jeke kabınetińizdi paıdalana alasyz nemese Bilim basqarmasynyń resmı saıtyn qaraýǵa bolady. Sondaı-aq, keńes berý pýnkteriniń mekenjaılary da resmı saıtta kórsetilgen.
Buǵan deıin Zerendide balalar men jasóspirimder sport mektebi ashylǵanyn jazǵan edik.