Astanada balalar aýrýhanasynyń meıirgerinen týberkýlez anyqtaldy
ASTANA. KAZINFORM — Medbıke sońǵy ret 24 sáýirde jumysqa shyqqan. Qazirol qalalyq ftızıopýlmonologııa ortalyǵynda emdelip jatyr.
Astana qalasy Qoǵamdyq densaýlyq saqtaý basqarmasy medıtsınalyq uıym qyzmetkerleriniń birine qatysty taralyp jatqan aqparat boıynsha málimet berdi.
— 2026 jyldyń sáýir aıynda densaýlyq jaǵdaıy nasharlaýyna baılanysty medıtsınalyq kómekke júgingen № 1 Qalalyq balalar aýrýhanasynda jumys istegen medıtsınalyq meıirgerde týberkýlez aýrýy anyqtaldy. Qazirgi ýaqytta ol Qalalyq ftızıopýlmonologııa ortalyǵynda em qabyldap jatyr, — delingen Astana qalasy densaýlyq saqtaý basqarmasy taratqan habarlamada.
Eńbek mindetterin atqarý barysynda aýrý belgileri anyqtalmaǵan. Qyzmetker sońǵy josparly flıýorografııalyq tekserýden 2026 jyldyń aqpan aıynda ótken, nátıjesi boıynsha patologııa anyqtalmaǵan jáne jumysqa ruqsaty bolǵan.
— Aýrý anyqtalǵannan keıin medıtsınalyq uıymda barlyq qajetti sanıtarııalyq-epıdemııaǵa qarsy jáne profılaktıkalyq is-shara júrgizilip, sońǵy úsh aıdaǵy baılanysta bolǵan tulǵalar sheńberi anyqtaldy.
Sońǵy flıýorografııalyq tekserýden ótkenine alty aı jáne odan kóp ýaqyt ótken qyzmetkerler qaıta tekserýden ótti — barlyǵy 39 adam. Tekserý nátıjesi boıynsha aýrý jaǵdaılary anyqtalǵan joq, — delingen habarlamada.
Meıirger flıýorografııalyq tekserýden ótken jekemenshik medıtsınalyq uıymǵa qatysty ýákiletti organdar tarapynan tıisti tekserý júrgiziledi.
Mekemede sanıtarııalyq talaptarǵa sáıkes profılaktıkalyq is-sharalar jalǵasyp jatyr.
Aıta ketelik Qazaqstanda týberkýlezdi anyqtaý men emdeý tegin júrgiziledi.
