Astanada Aımaqtyq avıatsııalyq jańa oqý ortalyǵy ashylady
Álemniń 90 elinen 350 delegat qatysyp jatqan sımpozıýmda Azat Bekturov ózi basqaratyn kásiporynnyń áleýetin jáne onyń 2025 jylǵa deıingi damý josparyn tanystyrdy.
«Aldaǵy ýaqytta aeronavıgatsııalyq qyzmet kórsetý boıynsha spýtnıktik telekanaldar engizilip, aeronavıgatsııalyq aqparattardy basqarý júıesi qolǵa alynady. Atalǵan jobalar ulttyq áýe keńistigin basqarýǵa úlesin qosyp, kadrlardy daıarlaýda septigin tıgizedi. Kadrlardy daıarlaý bizdiń óz qolymyzda. Bizde ózimizdiń jeke oqý ortalyǵymyz bar. Onyń bazasynda «Qazaeronavıgatsııa» mamandary ǵana emes, elimizdegi avıatsııalyq salanyń barlyq mamandary biliktilikterin arttyra alady. Búgingi kúni avıatsııalyq oqý ortalyǵynda jetekshi kásibı mamandar 70 sertıfıkattalǵan baǵdarlamamen zamanaýı oqý aýdıtorıasynda bilim beredi», - deıdi ol.
Azat Bekturov mekeme munymen toqtamaı, endigi kezekte jetekshi aımaqtyq avıatsııalyq oqý ortalyǵyn ashýdy josparlap otyrǵanyn tilge tıek etti.
«Aımaqtyq oqý ortalyǵynyń qurylysyn kelesi jyly bastaý kózdelýde. Biz azamattyq avıatsııa salasynda personaldardyń sapaly qyzmetin ishki naryqta ǵana emes, aımaqtyq jáne halyqaralyq deńgeıde kórsetýdi oılastyrýdamyz. Josparǵa sáıkes, jańa oqý ortalyǵyna avıatsııa salasynyń úzdik sarapshylary men mamandary shaqyrylady. Oqý ortalyǵy Ortalyq Azııadaǵy avıatsııa mamandaryn daıarlaýda aımaqtyq ınstıtýtqa aınalady degen senimdemiz», - deıdi Azat Bekturov.
Eske sala ketsek, Halyqaralyq azamattyq avıtsııa uıymy (IKAO) «Qazaeronavıgatsııa» RMK-men birlesip, Astana qalasynda Avıatsııa mamandaryn daıarlaý jáne TRAINIR PLUS jónindegi óńirlik sımpozıýmyn ótkizýde. Sımpozıýmdy alǵash ret Qazaqstanda jáne Ortalyq Azııada uıymdastyra otyryp, Qazaqstan áýe kóliginiń qaýipsiz, senimdi jáne turaqty damýyn qoldaý maqsatynda avıatsııa mamandaryn daıarlaý salasynda IKAO joǵary standarttaryn ustanatynyn kórsetpek.
