Astanada «Aıbyndy Aqjaıyqtan» kontserti ótedi
Erkin Nurymbetovtiń kontsertin ótkizýdi Qazaqstannyń eńbek sińirgen qaıratkeri, professor Aıtqalı Jaıymov jetekshilik etetin Astana qalasynyń memlekettik fılarmonııasynyń halyq aspaptar orkestri jyldyń basynda josparyna engizgen bolatyn.
Ǵarıfolla Qurmanǵalıev atyndaǵy Batys Qazaqstan oblystyq fılarmonııasy Dáýletkereı atyndaǵy qazaq halyq aspaptary orkestriniń kórkemdik jetekshisi jáne bas dırıjeri, M.Ótemisov atyndaǵy BQMÝ-niń qaýymdastyrylǵan professory Erkin Nurymbetovtiń aıtýynsha, bul kontsert Qazaq handyǵynyń 550 jyldyǵyna arnalǵan.
«Baǵdarlamaǵa orkestr buryn oryndamaǵan, onyń ishinde Batys Qazaqstan óńiri halyq kompozıtorlarynyń týyndylary enip otyr. Atap aıtqanda, Qurmanǵazynyń «Qýanysh» kúıi alǵash ret oryndalady. Sol sııaqty Mahambettiń «Qıyl qyrǵyny» kúıi de alǵash ret kórermen nazaryna usynylmaqshy. Dáýletkereıdiń «Bapas», Jantóreniń «Shalqyma» atty kúıleri buryn oryndalmaǵany anyq. Astana orkestrimen eki-úsh kún boıy birge jumys istep jatyrmyn. Buryn oryndalmaǵan shyǵarmalardy da birden qaǵyp alyp, sáni men sazyn keltirip otyr», - dedi ol.
Erkin Nurymbetov Qurmanǵazy, Dáýletkereı, Jantóre jáne Mahambettiń atalǵan kúılerin orkestrge túsirgen.
Osy keshte Arman Jaıymnyń qobyz ben orkestrge arnalǵan týyndysyn respýblıkalyq konkýrstardyń laýreaty Sadjana Mýrzalıeva oryndaıdy.
Kontsertte Astana qalasynyń memlekettik fılarmonııasynyń ánshisi, halyqaralyq jáne respýblıkalyq konkýrstardyń laýreaty Aızada Qaponova birqatar ánderdi shyrqaıdy dep kútilýde.
E.Nurymbetovtyń «Baldyrǵan» atty shyǵarmasyn jeke sazsyrnaıda Prezıdent orkestriniń ártisi, respýblıkalyq konkýrstardyń laýreaty Aqbópe Ábilbekova oryndaıdy.
Avtordyń «Oralym - asyl qalam» týyndysyn (sózin jazǵan Ashat Maemırov) Ǵ.Qurmanǵalıev atyndaǵy BQO fılarmonııasynyń solısi, respýblıkalyq M.Tólebaev atyndaǵy vokalıster konkýrsynyń laýreaty Aıbar Haıyrhanov kórermenderge usynady.
Belgili aıtys aqyny, Qazaqstannyń eńbek sińirgen qaıratkeri Hatımolla Berdiǵalıev kontsert barysynda Muhıt ánderin shyrqaıdy. Ol orkestrdiń súıemeldeýimen jańa ánderdi oryndaıdy. Sondaı-aq osy keshte kórermender Tuıaq Shamelovtiń «Nurǵısa aǵama saǵynysh» ánin tyńdaý múmkindigine ıe bolmaq. Muqan Tólebaevtyń «Birjan Sara» operasynan «Estaıdyń termesi» shyrqalmaqshy.
Sonymen qatar kompozıtor E.Nurymbetovtyń birqatar shyǵarmalary kontsert baǵdarlamasyna engen.
