Elordada aıaldamany syndyrǵan er adam qamaýǵa alyndy

ASTANA. KAZINFORM — Astanada kez kelgen vandalızm jáne qoǵamdyq tártipti buzý faktilerine qarsy júıeli kúres júrip jatyr. Kezekti vandaldy polıtsııa qyzmetkerleri anyqtap, jaýapqa tartty, dep habarlaıdy qala ákimdiginiń resmı saıty.

Qalalyq polıtsııa departamentiniń málimetinshe, túngi ýaqytta 20 jastaǵy er adam Moldaǵulova kóshesimen ótip bara jatyp, aıaldamanyń artqy qabyrǵasyn teýip syndyrǵan. Oqıǵa sol mańdaǵy beınebaqylaý kamerasyna túsip qaldy. Oqıǵa ornyna polıtsııa jasaǵy jetip, kúdiktini anyqtap, ustady.

— Atalmysh iske qatysty sot ony 10 kúnge qamaýǵa alý týraly sheshim shyǵardy. Sondaı-aq er adam zalaldyń ótemin tóleýge mindetti. Polıtsııa mundaı quqyq buzýshylyqtar qoldanystaǵy zańnama aıasynda qatań túrde toqtatylatynyn eskertedi, — delingen habarlamada.

Aıta keteıik, Astanada «Toqta, vandal» aktsııasy jalǵasyp jatyr. Oǵan volonterlar, belsendiler, tanymal sportshylar men qala turǵyndary qoldaý kórsetken. Aktsııanyń maqsaty — vandalızmniń aldyn alý jáne qalany taza ári tártipti saqtaý.

«Zań jáne tártip» qaǵıdaty aıasynda polıtsııa qyzmetkerleri prokýratýramen birlese otyryp, vandalızmge qarsy belsendi jumys júrgizedi. Múlikti qasaqana buzý nemese zaqymdaý — 60 AEK kóleminde aıyppul nemese 30 kúnge deıin qamaýǵa alý arqyly jazalanady.

Budan buryn elordada mamandar alpınıstik quraldardyń kómegimen balalardy qutqarǵanyn jazdyq.