Astanada aýyr atletıkadan Qazaqstan chempıonaty aıaqtaldy
ASTANA. KAZINFORM — Qazaqstan aýyr atletıka federatsııasynyń bas hatshysy, Azııa chempıony jáne halyqaralyq dárejedegi tóreshi Madına Astamırova jarystaǵy tóreshiler quramy men dopıngke qarsy júrgizilgen jumystardyń nátıjeleri týraly aıtyp berdi.
Onyń aıtýynsha, tóreshilikti damytý federatsııanyń basym baǵyttarynyń biri.
— Qazaqstan chempıonatynda barlyǵy 36 tóreshi qyzmet atqardy, olardyń 28-i halyqaralyq sanatqa ıe. Tóreshiler alqasyn bas tóreshi Rýslan Sergeev basqardy, ol óte tájirıbeli maman, eshbir aımaqqa qatysy joq jáne sheshimniń ádil qabyldanýyn qamtamasyz etedi, — dedi ol.
Madına Astamırova aýyr atletıkada daýly jaǵdaılardyń sırek kezdesetinin atap ótti.
— Negizgi máseleler kóbine tehnıkaǵa baılanysty týyndaıdy, mysaly, shyntaqty tolyq jazbaý nemese sporttyq kıim úlgisi. Barlyq sheshim alqaly túrde qabyldanady. Al eger pikir qaıshylyǵy bolsa, sońǵy sheshim bas tóreshiniń quzyrynda qalady, — dep túsindirdi ol.
Sondaı-aq ol sátti jasalǵan tásilden keıin sportshylardyń emotsııalyq qımyldaryna qatysty pikir bildirdi.
— Emotsııalyq qımyldarǵa ereje boıynsha tyıym salynbaıdy. Tóreshi tek qaýipsizdik turǵysynan ǵana eskertý jasaı alady. Shtangany kóterip turǵanda esh nársege alańdaýǵa bolmaıdy, — dedi federatsııa ókili.
Federatsııanyń bas hatshysy sońǵy eki jylda dopıngke qarsy kúres negizgi reformalyq baǵytqa aınalǵanyn eske saldy.
— Oń nátıje bergen synamalar sany shamamen 95 paıyzǵa qysqardy. Bul Qazaqstannyń dopıngke qarsy ortalyǵymen birlesip júrgizilgen júıeli jumystyń nátıjesi, — dep atap ótti ol.
Madına Astamırovanyń aıtýynsha, federatsııa baqylaýdy aıtarlyqtaı kúsheıtken.
— Biz bir jyldaǵy tekserý kólemin 500 synamaǵa deıin arttyrdyq. Birde-bir sport túrinde sportshylar osynshalyqty jıi ári kóp tekserilmeıdi, oǵan qosa halyqaralyq baqylaý da bar. 2024 jyldyń qorytyndysy boıynsha bes oń nátıje tirkeldi, negizinen zár aıdaıtyn dáriler men medıtsınalyq preparattar. Árbir jaǵdaı boıynsha ishki tekserý júrgiziledi, — dedi ol.
Sonymen qatar, tártiptik sharalardyń qatań qoldanylatynyn aıtty.
— Eger jattyqtyrýshy ne sportshy erejeni buzsa, tipti dárilik preparattarǵa qatysty bolsa da, biz mindetti túrde sanktsııa qoldanamyz. Bizdiń túpki maqsatymyz zań buzý táýekelin tolyq joıý jáne taza sportty qamtamasyz etý, — dep qorytyndylady Madına Astamırova.
Aıta ketelik Lıýbov Kovalchýk aýyr atletıkadan Qazaqstan chempıony atandy.