Astanada áskerı parad bastaldy
ASTANA. KAZINFORM — Elordadaǵy «Qazaq Eli» alańynda Memleket basshysy — Qazaqstan Qarýly Kúshteriniń Joǵarǵy Bas qolbasshysy Qasym-Jomart Toqaevtyń qatysýymen Uly Jeńistiń 80 jyldyǵyna arnalǵan áskerı parad bastaldy.
Áskerı sherýge elimizge memlekettik saparmen kelgen Vetnam Kommýnıstik partııasy Ortalyq komıtetiniń Bas hatshysy To Lam, sondaı-aq dıplomatııalyq korpýstyń ókilderi de keldi.
Atap aıtqanda, 1941-1945 jyldardaǵy alapat soǵysqa 1,2 mln-nan asa otandasymyz qatysty. Respýblıkanyń árbir tórtinshi turǵyna ásker qataryna shaqyryldy.
Osy saltanatty is-shara «Qazaq Eli» monýmenti aldyndaǵy alańda ótip jatyr. Paradqa 4 000-nan astam áskerı qyzmetshi jumyldyryldy.
Oǵan qosa, qala turǵyndary men qonaqtary 200-den astam zamanaýı áskerı tehnıka men qarý-jaraqty, áskerı-kólik avıatsııasynyń 66 ushaǵy men tikushaǵyn tamashalaı alady.
Sherýdi QR Prezıdentiniń Teleradıokesheni túsiredi. Kórermender áskerı sherýdi Jibek Joly jáne Silk Way telearnalarynan tikeleı efır arqyly tamashalaı alady.
Sondaı-aq áskerı sherý respýblıkalyq telearnalardan, elimizdiń barlyq qalasynda LED-ekrandardan, Qorǵanys mınıstrliginiń resmı YouTube-arnasynan tikeleı efırde kórsetiledi. Paradtan keıin qazaqstandyq estrada juldyzdary men shyǵarmashylyq ujymdardyń merekelik kontsertterin tamashalaýǵa bolady.
Buǵan deıin habarlanǵandaı, Astanada 7 mamyr — Otan qorǵaýshy kúni men 9 mamyr — Uly Jeńistiń 80 jyldyǵyna arnalǵan 100-ge jýyq túrli is-shara josparlanyp otyr. Olardyń arasynda kontsertter, kórmeler, aktsııalar, spektaklder jáne t. b. bar.
Eske salsaq, sáýir aıynda elordadaǵy áskerı paradqa qatysty qyzý daıyndyq júrip jatqanyn jazǵan edik.