Astanada arbadaǵy tennısten alǵashqy ITF Futures Series týrnıri máresine jetti
ASTANA. KAZINFORM — Astanada arbadaǵy tennısten ITF Futures Series boıynsha birinshi týrnırdiń jeńimpazdary anyqtaldy.
Qazaqstan tennıs federatsııasynyń baspasóz qyzmetinen málim etkenindeı, Ortalyq Azııa boıynsha alǵash ret uıymdastyrylǵan jarysqa AQSh, Japonııa, Aýstralııa, Frantsııa, Ońtústik Koreıa, Úndistan, Polsha, Qyrǵyzstan, Reseı, Belarýs jáne óz elimizdiń ókilderi qatysyp, birneshe kún boıy baq synady.
Erler arasynda jekeleı synda turaqty oıyn órnegin kórsetken japonııalyq Fýdzımoto Eshınobý chempıon atansa, aýstralııalyq Martın Dann fınalǵa deıin jetti.
Áıelder arasynda reseılik Vıktorııa Lvova úzdik shyqty. Ol fınalda Belarýs ókili Lıýdmıla Býbnovany utty.
Erlerden juptyq synda sońǵy básekede Martın Dann — japonııalyq Tachı Tomoıany tize búktirgen Fýdzımoto Eshınobý — ońtústikkoreıalyq Djı Hvan Lı jeńis tuǵyryna kóterildi.
Áıelderden juptyq synda qazaqstandyq Aıjan Bitimbaeva ońtústikkoreıalyq Pak Chjý-Enmen birge Qazaqstan tarıhynda alǵash ret ITF Futures Series dodasynyń fınalyna deıin jetti. Olar Vıktorııa Lvova — qyrǵyzstandyq Ámına Manǵutovaǵa ǵana ese jiberdi.
Qazaqstan tennıs federatsııasy ókilderiniń sózine qaraǵanda, alda ITF Futures Series boıynsha ekinshi týrnır ótedi.
Eske sala keteıik, budan buryn Astanada alǵash ret arbadaǵy tennısten ITF Futures Series týrnıri ótetinin jazǵan bolatynbyz.