Astanada «Ana men bala» alleıasy ashyldy

NUR-SULTAN. QazAqparat - Búgin Nur-Sultan qalasynyń №2 qalalyq balalar aýrýhanasynyń janynan «Ana men bala» alleıasy ashyldy, dep habarlaıdy QazAqparat tilshisi.

Qasıetti ramazan aıynda ótken shara múftııat mamandarynyń batasymen bastalyp, balalar aýrýhanasynyń aýlasyna 200-ge jýyq aǵash otyrǵyzyldy. Bul bastamany Qazaqstannyń isker áıelder qaýymdastyǵy qolǵa alǵan.

«Bul aktsııa berik otbasy sımvoly ispettes. Tamyryn tereńge jaıǵan aǵash, shańyraǵy bıik otbasy sııaqty emes pe. Sondyqtan, biz búgin bolashaqqa arnalǵan izgi is jasadyq dep esepteımin», - dedi alleıanyń ashylýynda Qazaqstannyń Іsker áıelder qaýymdastyǵynyń prezıdenti Raýshan Sársembaeva.

Aıta keterligi, elordadan bastalǵan estafetany qaýymdastyqtyń 17 óńirdegi bólimshesi qoldady. Osylaısha, búgin 17 qalada myńǵa jýyq kóshet egildi.