Astanada alıment tóleýden qashyp júrgen 170 boryshker anyqtaldy

ASTANA. KAZINFORM — Elorda prokýratýrasy elektrondy ámııandarynda aınalymy 300 mln teńgeden asatyn alıment tóleýden jaltarǵan 170 boryshkerdi anyqtady. Bul týraly Astana qalasynyń prokýratýrasy málim etti.

Osylaısha, bir ǵana boryshker alıment boıynsha 3,5 mln teńge qaryzy bola tura, óz ámııanyn 6 mln teńgege toltyrǵan.

«Alıment óndirýdiń osy jáne basqa da túıtkildi máseleleri qala prokýratýrasynyń alańynda ýákiletti organdar men jeke sot oryndaýshylardyń óńirlik palatasynyń qatysýymen ótken alqa májilisinde talqylandy» - delingen habarlamada.

Qadaǵalaý aktisi boıynsha ýákiletti organ jasyryn kiristerdi balalardyń paıdasyna óndirý boıynsha sharalar qabyldap jatyr.

Búginde boryshkerler 20 mln teńge qaryzyn ótep úlgerdi. Bul baǵyttaǵy jumystar jalǵasyp jatyr.