Astanada alaıaqtyq jolmen aqsha bopsalaǵandar sottaldy

ASTANA. QazAqparat – Sot úkimimen qylmystyq ortada baılanysy bar adamdar toby bopsalaý men alaıaqtyq jasaǵany úshin kináli dep tanyldy, dep habarlady QazAqparat.

Bas prokýratýranyń málimetinshe, 2016 jyly elorda aýmaǵynda kináli tulǵalar ótkiziletin aýktsıon qorytyndylaryna yqpal etýge jáne bıznes-keshen ǵımaratyn berýge ýáde etip, jábirlenýshiden shamamen 300 myń AQSh dollary kóleminde aqshalaı qarajatty aldaý arqyly ıelengen.

Odan ári qylmyskerler jábirlenýshiniń qarjylyq jaǵdaıy týraly bilip, uzaq ýaqyt boıy qoqan-loqqy, fızıkalyq zorlyq-zombylyq arqyly jábirlenýshi men onyń tanysynan oıdan shyǵarylǵan 120 myń AQSh dollary kóleminde jalǵan qaryzdy bopsalaǵan.

2021 jylǵa deıin atalǵan quqyq buzýshylyqtar ashylǵan joq.

Tek Astana qalasy prokýratýrasynyń nusqaýlarynan keıin ǵana qylmystyq is qaıta jandanyp, asa aýyr qylmystar jasalǵanyn kýálandyratyn jetkilikti jáne jol beriletin dáleldemeler jınaqtaldy.

Tergeý nátıjeleri boıynsha prokýratýra aıyptaý aktisin jasady.

Sotta memlekettik aıyptaýshymen olardyń kinási týraly kúmánsiz dálelder keltirildi.

Sot úkimimen kináli tulǵalar uzaq merzimge bas bostandyǵynan aıyrý jazasyna sottaldy.

Úkim zańdy kúshine endi.