Astanada alaıaq áıel jasóspirimdi aldap, 1,5 mln teńgeniń altyndaryn alyp ketken

NUR-SULTAN. QazAqparat – Saryarqa aýdany polıtsııa basqarmasynyń krımınaldyq polıtsııa qyzmetkerleri jedel izdestirý is-sharalary keshenin júrgizý barysynda birqatar alaıaqtyq jasaǵany úshin 34 jastaǵy áıeldi ustady, dep habarlaıdy QazAqparat Nur-Sultan qalasy PD baspasóz qyzmetine silteme jasap.

«Nur-Sultanda kúdikti kámeletke tolmaǵan balalarǵa jaqyndap, ózin emshi retinde tanystyrǵan jáne olardyń ata-analarynyń, jaqyn týystarynyń dýalaǵan qarǵystaryn sheship beremin degen syltaýmen úıden zergerlik buıymdardy alyp shyǵýlaryn suraǵany anyqtaldy. Osylaısha áıel, úılerindegi altyn dýalanǵanyn jáne baqytsyzdyq ákelýi múmkin degendi aıtyp, balalardy aldap ketken.

Alaıaqtyń aıla-amalyna 16 jasar qyz bala aldanyp, oǵan 500 myń teńge turatyn altyn bergen. Kelesi bir jaǵdaıda, alaıaq jaǵalaýda 13 jasar qyzdan bir jarym mıllıon teńge somasyna altyn buıymdy ıemdenip ketken», - delingen habarlamada.

Qazirgi ýaqytta kúdiktige qatysty QR QK 190-baby boıynsha sotqa deıingi tergeý amaldary júrgizilip jatyr. Buryn áıeldiń alaıaqtyq jasaǵany úshin sottalǵany anyqtaldy. Ol Nur-Sultan qalasy polıtsııa departamentiniń ýaqytsha ustaý ızolıatoryna qamaldy.