Astanada 700-den astam jas sarbaz ant qabyldady
ASTANA. KAZINFORM — 5573 áskerı bóliminde 700-den astam jas sarbaz áskerı ant qabyldady. Saltanatty rásimge bólimniń jeke quramy, sarbazdardyń ata-analary men jaqyndary qatysty, dep habarlaıdy Іshki ister mınıstrliginiń baspasóz qyzmeti.
Jas sarbazdar Qazaqstan Respýblıkasynyń Konstıtýtsııasy men zańdaryn saqtaýǵa, Otanǵa adal qyzmet etýge jáne áskerı boryshyn abyroımen atqarýǵa sert berdi. Endi olar qala kóshelerinde jáne sańyzdy is-sharalar kezinde jaýyngerlik qyzmet atqarýǵa kirisedi.
Іs-sharada áskerı bólim komandıri Jandar Áshirbekov jas jaýyngerlerdi quttyqtap, áskerı anttyń ár sarbaz úshin úlken jaýapkershilik ekenin atap ótti.
— Búgin sizder er azamatqa tán eń úlken jaýapkershiliktiń birin moıyndaryńyzǵa aldyńyzdar. Áskerı ant — jaı ǵana sóz emes, ol Otanǵa, halyqqa, ata-anaǵa degen adaldyqtyń aıqyn kórinisi. Sizderge artylǵan senimdi aqtap, Ulttyq ulan jaýyngerine laıyq qyzmet atqarady dep senemin, — dedi Jandar Áshirbekov.
Rásimge 3 myńǵa jýyq ata-ana men sarbazdardyń týystary qatysyp, uldarynyń el qorǵaý jolyndaǵy alǵashqy qadamyna kýá boldy. Qatardaǵy jaýyngerlerdiń biri Dıas Botaev áskerı ant qabyldaýdy úlken abyroı sanaıtynyn aıtyp, Otan aldyndaǵy mindetin adal oryndaýǵa daıyn ekenin jetkizdi.
Saltanatty shara jeke quramnyń sap túzeýimen jáne áskerı tehnıkalardyń júrip ótýimen aıaqtaldy.
Budan buryn almatylyq kýrsanttar Іle Alataýyndaǵy 3500 metrlik shyńdy baǵyndyrǵanyn jazǵanbyz.