Astanada 4 tonna nasybaı joıyldy
ASTANA. KAZINFORM - Atyraýda ótken quryltaıda Memleket basshysy jastardyń nasybaıǵa áýes bolyp, densaýlyqtaryna zııan tıgizip jatqanyn aıtqan bolatyn.
Bul rette, Astanada zııandy qaldyqtardy joıý jónindegi mamandandyrylǵan mashınada buryn tárkilengen 4 tonna nasybaı joıyldy. Aktsııany elorda ákimdigi men jergilikti polıtsııa departamenti birlesip uıymdastyrdy.
18 naýryzdan bastap elordada shegilmeıtin temeki ónimderin tárkileý jónindegi ýákiletti organdar birlesip, arnaıy reıdter júrgizýde.
— Búgin Astana ákimdigi polıtsııa departamentimen birlesip, 4 tonna shegilmeıtin temeki ónimderin joıý boıynsha aktsııa uıymdastyrdy. Bul qozǵalystyń maqsaty - salaýatty ómir saltyn nasıhattaý jáne jaman ádetterge degen teris kózqarasty qalyptastyrý. Astananyń ǵana emes, basqa óńirlerdiń jastaryn bizge qosylýǵa jáne salaýatty ómir saltyn nasıhattaýǵa shaqyramyz, — dedi qalalyq jastar saıasaty máseleleri basqarmasynyń basshysy Samat Ibraev.
Tárkilengen zattyń barlyq kólemi medıtsınalyq qaldyqtardy kádege jaratý úshin mamandandyrylǵan mashınada joıyldy. Atalǵan aktsııany ótkizýdiń mańyzdylyǵy týraly Astana qalasy máslıhatynyń depýtaty, «Amanat» partııasynyń «Jastar Rýhy jastar qanatynyń tóraǵasy Maǵzum Arslanbek te aıtyp berdi.
— Bul aktsııanyń negizgi mıssııasy — jastardyń mundaı zattardy tutynýyna tosqaýyl qoıý. Jaqynda Ulttyq quryltaı ótkenin bárimiz bilemiz, onyń aıasynda Memleket basshysy birqatar ózekti máseleni, sonyń ishinde shegilmeıtin temeki ónimderin, veıpterdi, sıntetıkalyq esirtkilerdiń qoǵam dertine aınalǵanyn atap ótti. Búginde bul másele ásirese jastar arasynda óte ózekti ekenin estip te, kórip te júrmiz. Sebebi bul veıppterdi negizinen 25 jasqa deıingi jasóspirimder men jastar paıdalanady. Biz úshin bul túıtkildiń túıinin tarqatý óte mańyzdy. Sondaı-aq, bul aktsııaǵa turǵyndardy beı-jaı qaramaýǵa shaqyramyz, - dedi halyq qalaýlysy.
Onyń aıtýynsha, elordada tyıym salynǵan temeki qospasymen belsendi kúres jalǵasa bermek.
- Tórt tonna — bul óte úlken kólem, biraq biz munymen toqtap qalmaımyz. Bul reıdter júıeli túrde jalǵasady. Jastarǵa kúndelikti qoldanatyn ózge paıdaly, tıimdi nárseler bar ekenin qarapaıym tilde túsindire alatyn qoǵamdyq kóshbasshylardy da tartatyn bolamyz. Osy aktsııa aıasynda zııandy zattardy joıyp qana qoımaı, jastardyń sporttyq ómirge belsendi qatysýy úshin buqaralyq sport túrin damytýǵa baǵyttalǵan birqatar is-shara josparlanyp otyr, —dedi Maǵzum Arslanbek.
Aktsııaǵa bar álemge «alyp kúsh» ıesi retinde tanylǵan, QR Týrızm jáne sport mınıstrliginiń resmı elshisi Sergeı Tsyrýlnıkov te qatysty.
— Bizdiń jastarymyz atalǵan zııandy zattarǵa táýeldi bolyp barady. Mundaı aktsııalar bizdiń jaman ádetterge tózbeıtinimizdi anyq kórsetedi. Biz jastardy durys jolmen tárbıeleýimiz kerek. Jaman ádetterdi sportpen shuǵyldaný jáne basqa da paıdaly daǵdylar sııaqty durys ádettermen almastyrýymyz qajet. Biraq, eń aldymen, jastarymyzdyń psıhologııalyq tárbıesine nazar aýdarý mańyzdy. Bul — tek otbasynyń ǵana emes, jalpy memlekettik máselesi. Jastarmen túsindirý jumystary júıeli júrgizilýi tıis, —dedi ol.
