Astanada 4 adam quldyqta bolǵan, onyń bireýi áıel

ASTANA. KAZINFORM – Elordada ótken aıda adamdardy quldyqta ustaýdyń 4 deregi anyqtalǵan. Bul týraly Astana qalasyndaǵy LIDER.KZ izdeý-qutqarý jasaǵynyń jetekshisi Aızada Júsipova aıtty.

«Qazan aıynda elordada quldyqta ustaýdyń 4 deregi anyqtaldy. Ondaı adamdar ózderi jaıly aıtýǵa qorqady, biz olarmen tek kamerasyz, mıkrofonsyz baryp qana tildese alamyz. Onyń ishinde bir qyz jynystyq quldyqta bolǵan», - dedi ol Astanada ótken kóshi-qon máselesine qatysty qoǵamdyq tyńdaýda.

Sondaı-aq qutqarý jasaǵynyń jetekshisi Astanaǵa kelgen soń týystarymen baılanysy úzilgen adamdar sany sońǵy úsh jylda eki ese óskenin atap ótti.

«Joǵalǵan adamdardy izdeý barysyn baqylap otyrǵan qoǵamdyq birlestik retinde Astanaǵa kelgen soń týystarymen baılanysy úzilgen adamdardyń statıstıkasy ósip kele jatqanyn kórip otyrmyz. Máselen, úsh jyl buryn osylaı joǵalǵan adam sany 180 bolsa (130-y — týystarymen baılanysy úzilgen, 50-i respýblıkalyq izdeýde), búgingi tańda bundaı kórsetkish 350 adamǵa jetip otyr», - dedi Aızada Júsipova.

Odan bólek, volonter adamdar mundaı jaǵdaıǵa tap bolmas úshin qandaı jumystardy qolǵa alý kerektigin aıtty.

«Biz adamdardyń jumyspen qamtylýy, Kóshi-qon polıtsııasy jaqsy jumys isteýi jáne úı-kúıi joq adamdardyń az bolýy úshin kúresemiz. Astana qalasy ákimdiginiń «Demeý» áleýmetke qosý ortalyǵymen" tikeleı baılanysta jumys isteımiz. Bul ortalyq jaqsy jumys isteıdi, alaıda múmkindigi shekteýli. Olarda 55 qana tósek oryn bar, bul bizdiń qala úshin óte az. Men ótken jolǵy bir jıynda osyndaı ortalyqtardy kóptep ashýdy usynǵanmyn. Sebebi bizdiń qalamyzǵa kelgen adamnyń bári birden jumys taýyp, jaqsy ornalasyp kete almaıdy. Qujatty retteý de jyldam júzege aspaı qalýy múmkin. Osyndaı jaǵdaılar adamnyń joǵalyp ketýine ákep soqtyrady. Ol úısiz-kúısiz dalada qonýy, ony bireýler jumysqa jegýge qul retinde alyp ketýi múmkin. Al ol jaqtan ekiniń biri aman shyqpaıdy», - deıdi LIDER.KZ izdeý-qutqarý jasaǵy elorda bóliminiń jetekshisi.