Astanada 37 eldiń saıası sarapshylary jastar máselesin talqylaıdy
19-20 qazan kúnderi elordada «Jastardy ınvestıtsııalaý. Eshkimdi tys qaldyrmaıyq» taqyrybynda halyqaralyq konferentsııa ótedi. Oǵan memlekettik organdardyń, halyqaralyq jáne úkimettik emes jastar uıymdarynyń ókilderi, sondaı-aq otandyq jáne álemniń 37 elinen saıası sarapshylar qatysatyny kútilýde.
Konferentsııada jastarǵa óz múmkindikterin júzege asyrýǵa bóget bolyp otyrǵan kedergilerdi anyqtaýǵa, densaýlyq saqtaý, sapaly bilim alý salalaryndaǵy qoljetimdilikti qamtamasyz etýge basa mán beriledi.
«Konferentsııada jastardyń qazirgi tańdaǵy ózekti máseleleri qaralady. Jıyn jumysyna sheteldik sarapshylardan bólek, Ortalyq Azııa elderiniń úkimet basshylarynyń orynbasarlary men sol elderdiń depýtattary shaqyryldy. Keletin elderdiń tájirıbeleri men jastar saıasatyn damytý jobalary da qaralady. Budan bólek, jastardyń bilim alý men jumysqa turý múmkindikterin keńeıtý, aqparat, bilim alý, densaýlyq saqtaý salalarynyń qoljetimdi bolýy, azamattyq, ekonomıkalyq jáne áleýmettik máselelerge jastardyń tolyq qatysýy, sol sııaqty jahandaný jaǵdaıynda jastardyń múmkindikteri sóz etiledi», - dedi QR Qoǵamdyq damý mınıstrligi otbasy jáne jastar jónindegi komıtet tóraǵasynyń mindetin atqarýshy Ashat Oralov Ortalyq kommýnıkatsııalar ortalyǵynda ótken baspasóz máslıhatynda.
Onyń aıtýynsha, konferentsııa sessııalarynda Japonııa, Qyrǵyzstan, Fılıppın, Taıland, Shrı-Lanka, Indonezııa jáne taǵy basqa memleketterden kelgen sarapshylardyń pikiri tyńdalyp, shara nátıjesinde jastar deklaratsııasy qabyldanatyny josparlanǵan.
Konferentsııa uıymdastyrýshylary - QR Qoǵamdyq damý mınıstrligi, QR Parlamentiniń Májilisi jáne BUU-nyń Halyqtyń qonystanýy salasyndaǵy qory.
Aıta keteıik, Elbasy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda 2019 jyldy Jastar jyly dep jarııalaýdy usynǵan bolatyn.
