Astanada 21-22 naýryz kúnderi Naýryz meıramyna oraı qandaı is-sharalar ótedi
ASTANA. KAZINFORM — 14 naýryz kúni Naýryz meıramyn toılaýǵa arnalǵan Naýryznama onkúndigi bastaldy. Osy 10 kún ishinde Astanada merekege oraı 200-den astam aýqymdy is-sharalar – kontsertter, kórmeler, qoıylymdar, shyǵarmashylyq keshter jáne t.b. ótedi.
Qalanyń barlyq aýdanynda túrli merekelik sharalar ótedi. 21-22 naýryzda elordanyń qalalyq alańynda, «Qazaq eli» jáne «Báıterek» monýmentteriniń janynda, «Astana Arena» stadıony men EKSPO alańynyń aýmaǵynda qazaqstandyq estrada juldyzdarynyń qatysýymen negizgi merekelik kontsertter josparlanyp otyr.
Astanada Naýryz meıramyn toılaý aıasynda elorda turǵyndary men qonaqtary úshin tanymal óner juldyzdarynyń qatysýymen anımatsııalyq, teatrlandyrylǵan jáne kontserttik baǵdarlamalar ótedi. Sahnada Qanat Úmbetov, Abaı Begeı, Álisher Kárimov, Aıdar Baıdildın, «Altyn» trıosy, «Art Dombyra» toby, Mádı Qadyrov, Ǵalymjan Joldasbaı, Nurken ıAkııaev, «Melomen» toby, Jaqsykeldi Maıasarov, «Qazaqııa» dýeti, Áıgerim Mamyrova, Keńes Álimjan, Ǵadilbek Janaı, Marjan Arapbaeva, Nurlan men Murat, Ashat Tarǵyn, Aıgúl Imanbaeva, «Altyn» etno ansambli, DıArt toby, «Báıterek», Ernar Jumataev jáne t.b. syndy estrada juldyzdary men shyǵarmashylyq ujymdar óner kórsetedi.
Esil aýdanynda merekelik is-sharalar myna oryndarda ótedi:
- 22 naýryz kúni saǵat 13:00-de «Báıterek» monýmentinde kontsert qoıylyp, ulttyq sport túrlerinen jarystar ótedi, munda qolóner jármeńkesi men merekelik saýda uıymdastyrylady;
- 21 naýryz kúni saǵat 14:00-de jáne 22 naýryzda 13:00-de EKSPO aýmaǵynda kontserttik baǵdarlama, ulttyq sport túrlerinen jarystar, qolóner jármeńkesi, merekelik saýda-sattyq ótedi.
Saryarqa aýdanynda:
Merekelik is-sharalar qalalyq alańda 21-22 naýryz kúnderi saǵat 13:00-de bastalady. Merekelik shara barysynda segiz kıiz úı tigilip, elorda qonaqtary qolónermen tanysyp, ulttyq taǵamdar satylatyn, sol sııaqty dástúrli buıymdar jármeńkesin tamashalaıdy. Alańda ulttyq sport túrlerinen jarystar ótip, elordalyq ónerpazdardyń qatysýymen merekelik kontsert ótedi.
Sondaı-aq, 22 naýryz kúni saǵat 11:00-de «Qazaq kúresinen» qala turǵyndary arasynda birinshilik ótedi. Bilekti balýandar men jeńimpazdar úshin baǵaly syılyqtar bar.
Baıqońyr aýdanynda myna oryndar belgilendi:
21-22 naýryzda saǵat 13:00-den bastap Atatúrik saıabaǵyna kelýshiler merekelik kontserttik baǵdarlamalardy tamashalap, ulttyq sport túrlerinen: qazaq kúresi, arqan tartý, gir kóterý, asyq atý, qoı kóterý, t.b. jarystarǵa qatysa alady.
Sondaı-aq, arnaıy «Áz-Naýryz» fotoaımaq uıymdastyrylady.
Dál osyndaı baǵdarlama 21 naýryz kúni saǵat 12:00-de Jazýshylar alleıasynda (Abaı dańǵyly men Sembınova kóshesiniń qıylysy) ótedi.
Saraıshyq aýdanynda:
21 jáne 22 naýryz kúnderi saǵat 13:00-den bastap «Qazaq eli» monýmenti janyndaǵy alańda kontserttik baǵdarlama, ulttyq sport túrlerinen jarystar, qolóner jármeńkesi, merekelik saýda ótedi.
Almaty aýdanynda merekelik is-sharalar myna oryndarda ótedi:
- 21-22 naýryzda saǵat 13:00-de Táýelsizdik dańǵylynyń boıyndaǵy ál-Farabı atyndaǵy Oqýshylar saraıynyń aýmaǵynda kontsert pen ulttyq sport túrlerinen jarystar uıymdastyrylady, munda qolóner jármeńkesi men merekelik saýda ótedi, sonymen qatar ulttyq salt-dástúrdi kórsetetin kórinister uıymdastyrylady;
- 22 naýryz kúni saǵat 12:00-den bastap SANA sport kesheniniń aýmaǵynda, «Kúıshiler» alleıasynda, «Alma» gúlzary, R.Qoshqarbaev dańǵyly, 80/1, «Dostyq úıiniń» alańynda kontserttik baǵdarlama, ulttyq sport túrlerinen jarystar, qolóner jármeńkesi jáne merekelik saýda-sattyq ótedi.
Nura aýdanynda mereke 20 naýryzda bastalady. Osy kúni jáne 22 naýryzǵa deıin saǵat 13:00-den bastap «Astana Arena» stadıony aldyndaǵy alańda ulttyq naqyshta kıiz úıler tigilip, qolónershilerdiń saýda oryndary ashylady, sol sııaqty kontserttik baǵdarlama ótedi. Munda ulttyq sport túrlerinen de jarystar ótedi. Estelik fotosýretke túsý úshin búrkitshiler, tazylar, túıeler men jylqylar, taqyryptyq fotoaımaqtar bolady. Sondaı-aq etnıkalyq stıldegi kartınalar da kórmege qoıylady.
Turǵyndar 22 naýryz kúni saǵat 12:00-den bastap ózbek, túrikmen, tájik, qyrǵyz palaýy men ulttyq sýsyndardy satyp ala alady. Bul kúni «Han Shatyr» saýda ortalyǵyna qarama-qarsy ornalasqan «Ǵashyqtar» saıabaǵynda 4 eldiń elshiligi ulttyq stılde kıiz úılerin tigip, astanalyqtardy óz mádenıetindegi Naýryz merekesin toılaýdyń ereksheligimen tanystyrady. Nazar aýdararlyq taǵy bir oryn Jaǵalaý shaǵyn aýdanyndaǵy (Syǵanaq kóshesi, 1) saıabaq bolmaq, onda 22 naýryz kúni saǵat 12:00-den bastap búkil otbasy úshin baıqaýlar, kontserttik baǵdarlama jáne oıyn-saýyqpen birge aýqymdy gastronomııalyq festıval ótedi.