Investor quqyǵyn qorǵaý: Astanada 2,5 mlrd teńgeniń úsh jobasy júzege asatyn boldy

ASTANA. KAZINFORM – Elordanyń Saryarqa aýdanynda 138 ınvestordyń quqyǵy qorǵaldy. Bul týraly Saryarqa aýdany prokýratýrasynyń qoǵamdyq múddelerdi qorǵaý bóliminiń bastyǵy Tarhan Zakarın málim etti.

– Memleket basshysynyń tapsyrmasyna sáıkes, prokýratýra organdary ınvestıtsııalyq jobalardyń iske asyrylýyna qoldaý kórsetip keledi. Bul baǵyttaǵy jumys turaqty baqylaýda. Bıyl jalpy somasy 779 mlrd teńgeni quraıtyn 49 problemalyq joba boıynsha máseleler sheshimin tapty. Sonyń nátıjesinde 9 250-den astam jańa jumys orny ashyldy. Onyń ishinde Saryarqa aýdanynda quny 2,5 mlrd teńge bolatyn úsh joba oń sheshimin tapty. Nátıjesinde 138 ınvestordyń, onyń ishinde 15 sheteldik ınvestordyń quqyǵy qorǵaldy, – dedi Tarhan Zakarın.

Onyń aıtýynsha, prokýratýra aralasqannan keıin jerasty sýy men paıdaly qazbalardy paıdalanýǵa qatysty kedergiler joıylyp, ınvestorlarǵa qurylysqa ruqsat berilgen. Bul óz kezeginde birqatar ınvestıtsııalyq jobalardyń toqtap qalý qaýpin joıdy.

Sondaı-aq prokýrordyń aıtýynsha, taǵy tórt ınvestorǵa buryn berilmegen jer telimderi bólindi. Sonyń arqasynda ınvestorlar kópfýnktsıonaldy mektepter, qonaqúıler men saýyqtyrý ortalyqtaryn salý jobalaryn jalǵastyrýǵa múmkindik aldy.

Eske sala keteıik, elimizde kelesi jyldan bastap «Investıtsııaǵa tapsyrys» baǵdarlamasy iske qosylady.