Astanada 12 myń jas jumyssyz júr

Elordada jastar arasynda jumyssyzdyq kórsetkishi tómendegen, soǵan qaramastan 12 myń jas jumyssyz júr, dep habarlaıdy Kazinform agenttigi. 

«Astana qalasynyń statıstıka departamentiniń málimetinshe, elordada 14-35 jas aralyǵynda 440 myńnan astam jas bar. Eńbekke qabiletti jastar sany – 298 myń, onyń ishinde jumys isteıtinder 286 myń, jumyssyz – 12 myń jas azamat. Jastar arasyndaǵy jumyssyzdyq deńgeıi byltyrǵy osy kezben salystyrǵanda 0,6% tómendedi», - dedi Astana qalasy jastar saıasaty máseleleri basqarmasynyń basshysy Qaırat Qambarov qalalyq kommýnıkatsııalar qyzmeti alańynda ótken baspasóz máslıhatynda.

Onyń aıtýynsha, jastardy jumyspen qamtý máselesi ózekti.

«Bul baǵytta ákimdikpen birneshe baǵdarlama iske asyrylyp jatyr. Mysaly, jastarǵa arnalǵan «Jastar praktıkasy», «Alǵashqy jumys orny», «Urpaqtar kelisimsharty» taǵy sol sııaqty. Odan bólek, ár toqsan saıyn jastarǵa arnalǵan bos oryndar jármeńkesi ótkiziledi. Osy ýaqytqa deıin «Jastar» saraıynda, L.Gýmılev atyndaǵy Eýrazııa ulttyq ýnıversıteti jáne Esil ýnıversıtetinde ótkizildi. Kelesi bos oryndar jármeńkesi qazan aıynyń 24-ne josparlanǵan», - deıdi ol.