Astanada 1000-ǵa jýyq syrtqy jarnama taqtaıshasy alynyp tastaldy

ASTANA. KAZINFORM - Elordada qalanyń syrtqy kelbetin biryńǵaı dızaın-kodqa sáıkes keltirý jumysy júrip jatyr. Jyl basynan beri talaptarǵa saı kelmegen 1000-ǵa jýyq jarnama taqtaıshasy alynyp tastaldy, dep habarlaıdy elorda ákimdiginiń resmı saıty.

Esterińizge sala keteıik, bes aýdan ákimdiginiń qyzmetkerleri zańsyz jáne sáıkes kelmeıtin jarnamanyń dızaın-kodyn túsindirý jáne alyp tastaý boıynsha kóshpeli is-sharalar ótkizýde. Kásipkerlerge tıisti túsindirýler júrgiziledi, sol sııaqty dızaın-kodqa sáıkes kelmeıtin mańdaıshalardy aýystyrý qajettiligi týraly býkletter beriledi.

Elordanyń biryńǵaı arhıtektýralyq-kórkemdik kelbetine «Astana-Jarnama» KMM jaýapty, sondaı-aq mekeme qala aýmaǵynda ornalasqan syrtqy (kórneki) jarnamaǵa monıtorıng júrgizedi.

Jyl basynan beri ǵımarattar men qurylystardyń 161 qasbetine tekserý júrgizildi, onyń nátıjeleri boıynsha qoldanystaǵy zańnamanyń talaptaryna sáıkes kelmeıtin jáne Astananyń biryńǵaı sáýlettik kelbetin buzatyn syrtqy jarnamanyń 1000-ǵa jýyq elementi alynyp tastaldy.

Mekeme qyzmetkerleri 1238 kásipkerlik sýbektisin qabyldady, olarǵa ǵımarattardyń (qurylystardyń) qasbetterin sáýlettik-kórkemdik bezendirý máseleleri boıynsha qoldanystaǵy zańnamanyń talaptary túsindirildi;

Sondaı-aq kásipkerlik sýbektileri belgileriniń 564 eskızi qaraldy.