Astana turǵyndary qazaqstandyq ǵaryshkerdiń jerge qonǵan kapsýlasyn kóre alady
«Qoǵamdyq orynda mundaı kórmeni uıymdastyrý bastamasyn Astana ákimi Baqyt Sultanov kóterdi jáne bizdiń kompanııa eksponattardy ákeldi. Búginde Qazaqstannyń ǵaryshtyq qyzmetin nasıhattaýǵa erekshe kóńil bólinip jatyr. Onyń ústine, biz kórsetetin, biz aıtatyn dúnıe kóp", - dedi "Qazaqstan Ǵarysh Sapary" UK" AQ vıtse-prezıdenti Rashıt Ábdirazaqov.
Kórmede kelýshiler nazaryna skafandr men ǵarysh kemesiniń jerge qonatyn kapsýlasy qoıylǵan. Bul kapsýlamen qazaqstandyq ǵaryshker Aıdyn Aıymbetov jerge sátti qonǵan bolatyn.
Sonymen birge, "Qazaqstan Ǵarysh Sapary" UK" AQ kórmege Jerdi qashyqtyqtan zondtaıtyn KazEOSat -1 jáne KazEOSat -2 spýtnıkteriniń maketin ákeldi. Qazaqstan ǵaryshkerleri Toqtar Áýbákirov, Talǵat Musabaev jáne Aıdyn Aıymbetov týraly aqparattyq stendter de qoıyldy.
Demalys kúnderi kórmede "Qazaqstan Ǵarysh Sapary" UK" AQ qyzmetkerleri men volonterleri jumys isteıdi jáne kelýshilerge eksponattar jóninde qajetti aqparat beredi.
«Mundaı aktsııalar otandyq kosmonavtıkanyń jetistikteri men bolashaqqa degen josparyn nasıhattaýdyń jáne elimizdiń zamanaýı ǵarysh tehnologııalaryna degen halyq qyzyǵýshylyǵyn oıatýdyń tamasha múmkindigi", - deıdi kórme uıymdastyrýshylary.
Kórme úshin óz alańyn usynǵan MEGA Silk Way saýda-oıyn-saýyq ortalyǵyna "Qazaqstan Ǵarysh Sapary" UK" AQ ǵımarattyń ǵaryshtan túsirilgen sýretin syıǵa tartty.
