Astana - Transkaspıı avtojolyn salý kıik popýlıatsııasyna qalaı áser etedi
ASTANA. KAZINFORM – Ekologııalyq kodekstiń qazirgi redaktsııasy iri jol jobalaryn iske asyrǵan kezde Batys Qytaı - Batys Eýropa halyqaralyq kólik dálizin salǵan shaqta jiberilgen kemshilikterge jol bermeıdi. Ekologııa jáne tabıǵı resýrstar mınıstrligi Kazinform saýalyna joldaǵan jaýapta osyndaı ustanym bildirdi.

Másele qaıdan shyqty?
Prezıdent Qasym-Jomart Toqaev Býrabaıda ótken Ulttyq quryltaıda Úkimetke Astanadan Arqalyq, Torǵaı jáne Yrǵyz arqyly Transkaspıı halyqaralyq kólik dálizine týra shyǵatyn avtokólik jolynyń qurylysyn bastaýdy tapsyrdy.
Bul óńirler kıiktiń tirshilik aımaǵy bolyp esepteledi. Al kólik aǵyny mol, shekti jyldamdyǵy joǵary dálizderdiń kıik mıgratsııasyna keri áser etetinin Batys Qytaı - Batys Eýropa dáliziniń tájirıbesi kórsetip otyr. Astana - Transkaspıı avtojolyn jobalaýshylar osy máseleni qanshalyqty eskerip otyr degen suraq týyndaıdy.
Mınıstrliktiń ustanymy qandaı?
- Atalǵan avtokólik jolynyń jobasy boıynsha Ekologııa jáne tabıǵı resýrstar mınıstrligine qazirgi ýaqytta resmı materıaldar túspegen. Jobalyq-smetalyq qujattamalar jáne ekologııalyq saraptama materıaldary usynylǵan jaǵdaıda, qoldanystaǵy zańnamaǵa sáıkes ekologııalyq baǵalaý rásimderi júrgiziledi.
Mınıstrlik óz quzyreti aıasynda jabaıy janýarlardyń, sonyń ishinde kıikterdiń mıgratsııalyq dálizderine yqtımal áserlerdi baǵalaýǵa erekshe nazar aýdarady. Bul oraıda burynǵy ınfraqurylymdyq jobalarda (mysaly, «Batys Qytaı - Batys Eýropa» dálizi) jiberilgen kemshilikter eskerilip otyr, - dep jazylǵan vedomstvonyń resmı jaýabynda.

Ekologııa kodeksi ne deıdi?
Mınıstrlik mamandary Batys Qytaı - Batys Eýropa dálizin salǵanda ketken qatelikter Ekologııa kodeksiniń qazirgi redaktsııasynda eskerilgenin aıtyp otyr.
- Kodeks normalary bolashaqta usynylatyn kez kelgen kólik jobasyn memlekettik ekologııalyq saraptamadan ótkizýdi mindetteıdi. Osy saraptama zııandy áserdi boldyrmaý nemese azaıtý boıynsha naqty usynystardy qamtý kerek. Onyń ishinde:
- Ekologııalyq ótkelder (faýnaǵa arnalǵan ótkelder) salý qajettiligi;
- Kıik mıgratsııasyna kedergi keltirmeý maqsatynda joldarda qorshaýlardyń úzilisin, kópirli qurylymdardy nemese jasandy ótkelderdi qarastyrý múmkindigi;
- Jobalaý satysynda Zoologııa ınstıtýtynyń jáne tabıǵat qorǵaý uıymdarynyń usynystaryn eskerý, - deıdi.
Buǵan deıin Ekologııa jáne tabıǵı resýrstar mınıstrligi kıik sanyn retteýdiń negizgi qaǵıdattary aıqyndalǵanyn málim etti.
Aýyl sharýashylyǵy mınıstrligindegiler kıik taptaǵan jaıylymnyń shyǵynyn sýbsıdııamen toltyrý múmkin emes ekenin aıtty.
Al Ulytaý, Qaraǵandy, Qyzylorda, Atyraý, Batys Qazaqstan oblystarynda kıikter qyrylyp jatyr. Ekologııa jáne tabıǵı resýrstar mınıstrligi osyǵan qatysty túsinik berdi.