«Astana-Temritaý» jáne «Astana-Pavlodar» baǵytyndaǵy jol jabyldy

ASTANA. QazAqparat – Aýa raıynyń qolaısyzdyǵyna baılanysty Astana qalasynan Temirtaýǵa deıingi jáne Pavlodar oblysynyń shekarasyna deıingi jol jabyldy, dep habarlaıdy QazAqparat.

Ikomek qyzmeti 23 aqpandaǵy 22:00-degi ahýal boıynsha kún raıynyń nasharlaýyna baılanysty (aýa temperatýrasynyń kúrt tómendeýi, kóktaıǵaq) «Ekaterınbýrg-Almaty» respýblıkalyq avtojolynyń 1291-1426 shaqyrymy aralyǵy, ıaǵnı Astana qalasynan Temirtaý qalasyna deıingi aralyqtaǵy jolda kóliktiń barlyq túriniń qozǵalysy shektelgenin málim etti.

Odan bólek, 22:00-den bastap kún raıynyń qolaısyzdyǵyna baılanysty (aýa temperatýrasynyń kúrt tómendeýi, kóktaıǵaq) «Astana-Ereımentaý-Shiderti» respýblıkalyq avtojolynyń 16-200 shaqyrymy aralyǵy, ıaǵnı Astana qalasynan Pavlodar oblysynyń shekarasyna deıingi aralyqtaǵy jolda kóliktiń barlyq túriniń qozǵalysy shektelgeni habarlandy.