Astana sý qoımasyn tolyq tazartýǵa shamamen 10 jylǵa jýyq ýaqyt ketýi múmkin

ASTANA. QazAqparat - Osy jyldyń 11 shildesinde Memleket basshysynyń qatysýymen ótken Astana qalasyn damytý máseleleri jónindegi keńeste aıtylǵan Prezıdenttiń tapsyrmasy boıynsha, QR Ekologııa jáne tabıǵı resýrstar mınıstrligi Astana sý qoımasyn tazartý jumystaryn júrgizýdi qolǵa aldy.

Bul týraly QazAqparat QR Ekologııa mınıstrliginiń baspasóz qyzmetine silteme jasap habarlaıdy.

Baspasóz qyzmetiniń málimetterine qaraǵanda, 1970 jyly salynǵan Astana sý qoımasyna osy ýaqytqa deıin tazartý jumysy júrgizilmegen. Ol elordamyzdy aýyz sýmen qatamasyz etetin jalǵyz sý qoımasy. Qoımanyń jalpy kólemi 410,9 mln tekshe metr. Qazirgi kólemi 312,36 mln tekshe metr.

Osydan eki jyl buryn, Qazgıdromet mekemesi batımetrıkalyq túsirilim jasap, qoımanyń 46,7 mln tekshe metri tunba ekenin anyqtady. Bul – sý qoımasynyń 30%-i. 2023 jyly sýǵa degen suranys – 97 mln tekshe metr. Onyń 46 mln tekshe metri qoldanyldy, jyldyń sońyna deıin qosymsha 51 mln tekshe metrge suranys bar.

Astana halqynyń sany jyldan jylǵa ósip, tutyný kórsetkishi ulǵaıǵanyn eskere otyryp, qoımany tereńdetý, tazalaý boıynsha qos jobany qolǵa almaq. Sebebi, 2030 jyly Astana halqy 2 mln-ǵa jetken jaǵdaıda, 150 mln tekshe metr sý qajet bolady.

Tazalaý jumysyn bastamas buryn, aldymen, arnaıy súńgýirler sý túbinde naqty ne jınalǵanyn anyqtaýlary tıis, ıaǵnı, jumys barysy kezeń-kezeńmen júrgiziledi.

Mamandardyń aıtýy boıynsha, klımattyq jaǵdaıǵa baılanysty, balyqtyń ýyldyryq shashý kezeńin eskere otyryp, tazartý protsesi keminde 10 jylǵa sozylýy múmkin dep boljaıdy. Sebebi, 1 jylda 5 aıdaı ǵana jumys isteýge múmkindik bolady.