Astana prokýrory minez-qulqy qıyn jasóspirimderdi jumysqa ornalastyrýdy usyndy

ASTANA. QazAqparat - Osy aptada Astana qalasynyń prokýrory B.B. Dembaev vedomstvoaralyq jınalys ótkizdi, jınalys barysynda kámeletke tolmaǵandardyń qylmys jasaýynyń sebebi men sharttaryn taldaýdyń nátıjeleri men ýákiletti organdar jumysynyń tıimdiligi talqylandy.

Atalǵan jınalysqa Qazaqstan Respýblıkasy Parlament Májilisiniń Depýtaty I.V. Smırnova, «Qazaqstan Respýblıkasy Prezıdentiniń bilim qorynyń» jáne «Atameken» Ulttyq kásipkerlik palatasynyń ókilderi qatysty.

2016 jyly elordamyzda kámeletke tolmaǵandar 205 qylmys jasaǵan, qylmystyq quqyqbuzýshylyqtardyń 90% (187) menshikke qarsy, atap aıtqanda 78-i urlyq bolsa, 74-i tonaý.

Negizinen olar uıaly telefondar (76), aqsha (24), kólikter men kólik saımandaryn (15), kıimder (12) jáne velosıpedter (12) urlaǵan.

Kámeletke tolmaǵan qylmyskerlerdiń jalpy sanynan (178) 19 nemese 10% jaǵymsyz minezdemege ıe bolǵan, balalardyń qalǵan 90 % jaǵymdy nemese qanaǵattanarlyq minezdeme alǵan.

Qylmys jasaǵan balalardyń negizgi bóligi (149)  tárbıeli otbasynan, tek qana 18 bala az qamtylǵan otbasynan shyqqan. Kámeletke tolmaǵan balalardyń qylmys jasaý ortaq jasy - 16-17 jas.

Qylmystyń jasalý sebebi men sharttarynyń anyqtalýyn eskere otyryp, elorda prokýrorymen kámeletke tolmaǵandardy jumysqa ornalastyrý boıynsha jumysty jandandyrý usynyldy. Ol óziniń stýdent kezindegi ómirlik tájirıbesimen bólisti, eńbek otrıadtaryna minezi qıyn balalardy (sol kezde solaı atalatyn) bekitken kezderdi mysalǵa keltirdi. Jazǵy mezgil aıaqtalǵan soń balalardyń túzelýine áser etetin eńbek jáne úlkendermen aralasý tájirıbesine ıe bolǵandyǵyn atap ótti.

Prokýror «balalardy jumysqa turǵyzsa, qajet zattaryn satyp alýǵa múmkindik týdyratyn somany urlyq jasamaı tabýǵa jaǵdaı týyndaıdy» dep atap ótti. Kásipkerlerdiń yńǵaılyǵy úshin B.B. Dembaev kámeletke tolmaǵandardy jumysqa alýdyń sharttary kórsetilgen qujat úlgisin ázirleýdi tapsyrdy.

Sonymen qatar, ata-analarǵa konsýltatsııalyq, psıhologııalyq jáne qaıyrymdylyq kómek kórsetý kózdeledi.

Jınalys barysynda №28 jáne №34 mektepterde bala qylmysynyń erte aldyn-alýdyń tabysty tájirıbeleri tanystyryldy. Birinshi mektepte Aldyn-alý keńesiniń jumysy kórsetilse, ekinshisinde (34) professor F.ıA. Vasserman ázirlegen «Bıoınformatıka jáne sınergetıka» bilim alýdyń sapasyn basqaratyn tehnologııany engizýdiń nátıjesinde jaqsy nátıjege qol jetkizilgeni kórsetilgen.  

Elorda prokýrory atalǵan mektepterdegi tájirıbeni ózge de oqý oryndarynda tájirıbelik kómek kórsetý arqyly engizýdi tapsyrdy.