Astana men Pavlodar arasyna reıstik avtobýs júre bastady

PAVLODAR. KAZINFORM - Jolaýshylar eki aralyqqa nebári 4 myń teńge tólep jete alady. Jolda aıaldamalar qarastyrylmaǵan.

Pavlodarlyq jolaýshylar endi elordaǵa avtobýspen de qatynaı alady. Taksımen salystyrǵanda onyń jolaqy quny 2,5 ese arzan. Eresekter úshin – 4000 teńge, al balalarǵa 2000 teńge tóleısiz.

Bul týraly óńirlik jolaýshylar kóligi jáne avtokólik joldary basqarmasynan habarlady.

– Yutong avtobýsy jolaýshylardy turaqty tasymaldaıdy. Kólikke 49 jolaýshy syıady. Avtobýs kúnde tańerteń saǵat 7.00-de Pavlodar qalasynan shyǵady. Al saǵat 16.00-de Astana qalasynan keri saparlaıdy, - dep málimdedi basqarmadan.

Turaqty baǵyttaǵy avtobýs reısine «№1 avtobýs parki» JShS qyzmet kórsetedi.

Deıturǵanmen qysqy ýaqytta «Astana - Pavlodar» avtobany aýa raıyna baılanysty jıi jabylatynyn eskersek, temirjol kóligi qazirgi ýaqytta eń senimdi tasymal kólik túri bolyp tur.

Eske sala keteıik, bıyl Pavlodar áýejaıy jóndeýden keıin ashylady.